Декабрьданул 13-нний Дагъусттаннал ХIукуматрал Председатель АьвдулпаттахI Амирхановлул ххал бивгьунни МахIачкъалалив ва Каспийскалий цIуну бувсса к1ива оьрчIал багъ ва ца школа. БакIрай ми бувкIунни МахIачкъалалив Ак-гел бярнил райондалучIасса оьрчIал багъ ххал буван. Микку бувну бур 250 оьрчIансса багъ ца шинал мутталий, муний гьармур дузал дурну дур цин багьайсса куццуй.
Каспийскалийгу бувну бур 100 оьрчIансса багъ, му бур ттизаманнул тIалавшиннарду дузал дурну бувсса багъ. Ми кIивагу бувну бур «Дуккаву лядуккан даву» тIисса АьФ-лул паччахIлугърал программалул лагрулий. АьвдулпаттахI Амирханов рязину ливчIунни ми объектру баврия.
Гара кьини АьвдулпаттахI Амирханов ивунни Талгиллал шяраву 360 дуклаки оьрчIан бувсса школалийн. Му бувну бур «АьФ-лул инсантал ялапар хьунсса къатрал ва коммунал хIаллихшиннардил дузал баву» тIисса паччахIлугърал программалул лагрулий. Школа буллай байбивхьуну бур 2018 шинал, бувну бакIуйн буккан буван ккаккан бувну бур гьашинусса шинал ахирданий, зий байбишин аьркинссар 2021 шинал дайдихьулий. АьвдулпаттахI Амирхановлул тапшур бунни ми шанмагу объект ччясса мутталий бувну къуртал буван, февральданул 1-нния тинмай миккун оьрчIру зананшиврул.
