Декабрьданул 15-нний ДР-лул БакIчи Сергей Меликовлул каялувшиврий видеоконференциялул низамрай хьунни Дагъусттаннай коронавирусрал инфекция ппив шаврил хьхьичIалу кьукьаврин хасъсса Оператив штабрал батIаву.
Ххал бигьлагьисса масъаларттаву ца яла агьаммур бия республикалийсса санитар-эпидемиологиялул тагьар ва республикалий коронавирус ппив шаврил хьхьичIалу кьукьинсса хIарачатирттал хIакъиравусса масъала. БатIаврий гьуртту хьуминнал ххал бивгьунни пневмониялул ва коронавирусрал инфекциялул къашавай хьусса инсантал тIайлану хъин баврил, вакциналул ххалаххив баврил ва шаппа хъин хъанахъими дарурттал дузал баврил масъалартту.
Мукунма батIаврий вичIи дирхьунни ДГМУ-лий коронавирусращал талатиссаксса хIаллай кумаг байсса колл-центр сакин баврил хIакъиравусса информациялух.
Ми бакъассагу, личIину ххал бивгьунни Каспийск ва Избербаш шагьрурду марцIсса хIачIай щинал дузал бансса чараннал хIакъиравусса масъалагу.
