Мушакъатсса оьрчIан байран дунни

Мушакъатсса оьрчIан байран дунни

Декабрь зурул 21-нний МахIачкъалалив, «Европа» тIисса банкет залдануву, мушакъатминнал кьинилуцIун дархIуну 400 оьрчIансса байран дунни «Инсан» фондрал сипталийну. Ва байрандалул спонсоршивугу дурну дия фондрал муданасса кумагчи, меценат Арслан Ражабовлул.


ОьрчIру барча буван бувкIун бия Республикалул муфтиятрал председатель Шамил Аьлиханов, Халкьуннал Мажлисрал депутат Зумруд Бучаева, ОьрчIал ихтиярдалсса буллалисса вакил Марина Ежова, жагьилтурал иширттал министр Камил Сяидов, министерствардал вакилтал, олимпий чемпион Аьбдулрашид Садуллаев ва цаймигу бусравсса инсантал.

Камил Сяидовлул кIицI лавгуна «Инсан» фондрал мудангу дакI цIуцIисса аякьа дувайшиву мушакъатсса ва кумаграх мюхтажсса оьрчIаха, ятинтураха.

Национал политикалул ва диндалул иширттал министр­нал хъиривчу Мурад Шяпиевлулгу кIицI лавгуна фондрал цачIунмай бувайшиву мюнпатсса давуртту дуллан ччисса ва дуллалисса инсантал. Аьбдулрашид Садулаевлул кIицI лавгуна яхIлувсса, цIуцIаврихьхьун мадад къабуллалисса оьрчIал оьр­му махъминнан эбратну хьун аьркиншиву.

ОьрчIахьсса ва миннал нитти-буттахъахьсса барчаллагьрайсса ихтилатру чIявуя ва кьини залдануву. Сиптачитурал биял­сса хIарачат бувну бия оьрчIан дакIний личIансса байран сакин дуван. ОьрчIру цивппагу, миннал ниттихъулгу барчаллагьрай бия цалла дакIру шад дурсса заллухъруннайн.

КIицI лаганну, 2012 шиная шинмай «Инсан» фондрал мушакъатсса оьрчIру аякьалийн лавсун бушиву, шинал мутталий фондрал вакилтал, волонтёртал оьрчIал ялун-лув бияйшивугу.

Аватар

Патимат Рамазанова

Заслуженный работник культуры РД

Читайте также: