Салимат Кьурбановал аьпалул мажлис

Ларгсса нюжмаркьини Лакрал театрдануву хьунни Дагъусттаннал халкьуннал шаэр Салимат Кьурбанова дунияллийн бувккун 100 шин шаврил юбилейран хас бувсса аьпалул мажлис.


Халкьуннал шаэр дакIнийн бутан бувкIун бия ДР-лул Жяматийсса Палаталул хъунаманал хъиривчу Сапар Аьбдуллаев, ДР-лул БакIчиначIасса Хъунисриннал советрал хъунаманал хъиривчу Сиражуттин Илиясов, Композитортурал союзрал хъунама Рамазан Фаталиев, Культуралул зузалтрал профсоюзрал хъунмур Марзижат Буттаева, республикалул творчествалул интеллигенциялул ва Мариян Илиясовал цIанийсса «Дараччи» фондрал вакилтал.

Мажлис тIитIлай, ДР-лул культуралул министрнал хъиривчу Марита МухIадовал кIицI лавгуна Салимат Кьурбановал бивтсса ххуллу хьхьичIунсса ххуттай бушиву республикалул литературалул, культуралул ва тарихрал оьрмулуву.

Марзижат Буттаевал кIицI лавгуна Салимат Кьурбановал шеърирду ва балайрду лакрал агьулданун мудангу тIалавну бивкIшиву.
Шаэрнал шеърирдан кьимат бишлашисса ихтилатгу бувну, ганил аьпалун хас дурсса назму дурккуна Дагъусттаннал халкьуннал шаэр Космина Исрапиловал.
Лакрал райондалул Культуралул управлениялул каялувчи Ансар Къажлаевлул кIицI лавгуна Салимат Кьурбановал шеърирдайсса балайрдал хIакьинусса кьинигу агьамсса кIану бугьлай бушиву лакрал балайчитурал репертуардануву. Халкьуннал шаэрнал кIанттайн бияннин Салимат Кьурбановал шяраву зий, захIмат буллай лавгсса бигьабакъасса оьрмулия бувсуна ганил шяравудуш Сарат Жабраиловал.

Шаэр дакIнийн бутлатисса ихтилатру бувуна «Дараччи» фондрал хъунмур Гульшан Хасаевал, МахIаммадхIажи Къаплановлул.
Лакрал театрданул артистурал хIадур бувсса мажлисрай шаэрнал мукъурттий балайрду увкуна опералул театрданул балайчитурал Загьидат Муслимовал, Мадина Исмяиловал, Жанна Кьурбановал, ГИТИС къуртал бувсса Азиза АхIмадовал, Лакрал райондалул Магьирлугърал къатлул зузала Мариян Жамалуттиновал. Шеърирду бувккуна театрданул артистурал.

Мажлис бачин бувну бия Да­гъусттаннал халкьуннал артистал Аслан МахIаммадов ва Саният Рамазанова.

Салимат Кьурбанова дакI­нийн бутан бувкIцириннахь, аьпалул мажлис хIадур бувсса Лакрал театрданул каялувчитурахь ва муний гьуртту хьуминнахь барчаллагь увкуна душнил Асият Къаплановал.

Мажлисрал онлайн-трансляция най дия Инстаграм социал сетьрал Лакрал театрданул лажиндарай.