Оьрмулул 78 шинаву жуятува батIул хьунни медициналул эдмурдал доктор, профессор, Дагъусттаннал медициналуву яргсса аьш чирчусса хIакин-травматолог Абакаров Абакар Аьлил арс.
Увну ур Абакар 1942 шинал Хъусращиял шяраву. Школагу хьхьичIунну къуртал бувну, дуклан увххун ур Дагъусттаннал Мединститутравун. Шанна шинал мутталий ласлай ивкIун ур Лениннул цIанийсса стипендия.
[dropcap]И[/dropcap]нститут къуртал бувну махъ зий ивкIун ур Южно-Сухокумскалий навтбуккултрал медсанчастьрай хирургну. 1969 шинал конкурсрай ххув хьуну, увчIуну ур Горькийл цIанийсса НИИТО-лул чIивима элмийсса зузалану. ГИТО-лул аспирантурагу къуртал бувну, 1974 шинал дурурччуну дур оьрчIал ттурчIал азардайн дагьайсса кандидатнал диссертация. Гара шинал ивтун ур институтрал хъунама элмийсса зузалану. Абакар Абакаров кIулну ия лавайсса даражалул пишакарну.
Абакар Абакаровлул чирчуну дур сайки мукьттуршуннийн дирсса элмийсса давуртту, монографияртту. Ляхъан дурну дур ттурчIал азарду хъин дансса цIусса кьяйдарду. Биттур буллай ивкIун ур Горькийл (уттисса Нижегородский) областьрал цIуллу-сагъшиву дуруччаврил отделданул хъунама травматологнал буржру. 1987 шинал дурурччуну дур докторнал диссертация. Ишла буллай айивхьуну ур лякьлувара дурккун диркIсса бухчIинссаннул ттаркI хъин дайсса аппаратру. Мунийн бувну ванайн учайссагума бивкIун бур «Дагъусттаннал Илизаров» куну.
Лайкь хьуну ур «Отличник изобретательства и рационализации» тIисса лишандалун, «Заслуженный изобретатель РД», «Заслуженный деятель науки РД», «Заслуженный врач РД» цIардан ва «Отличник Здравоохранения Российской Федерации» медальданун.
1991 шиная шихунай А. Абакаров зий ивкIссар Дагъусттаннал медакадемиялул травматологиялул ва ортопедиялул кафедралул профессорну. ЧIярусса шиннардий зий ивкIссар дипломру лавсъсса пишакартал хIадур байсса факультетрал травматологиялул ва ортопедиялул кафедралул хъунаману.
Махъсса шиннардий Абакар Абакаровлул Аьрасатнал ва дунияллул сборникирттай рирщуну дур ххюцIалуннийн дирсса элмийсса давуртту, лавсун бур кIива патент, итабавкьуну бур шанма учебно-методический пособия. Ванал каялувшиндаралу дурурччуну дур урчIра кандидатнал ва кIира докторнал диссертацияртту. Зий ивкIссар Чачаннал ва Дагъусттаннал шагьрурдал травматологтурал пишакаршиву ларай давриха.
[dropcap]С[/dropcap]акингу дурну, хъунамашиву дуллай ивкIссар Дагъусттаннал травматологтурал ва ортопедтурал ассоциациялий.
Цала кулпат, республикалий хьхьичIунсса ккарччал хIакин, Зоя Абакароващал лайкьну тарбия увссар кIия арс. Хъунаманал язи бувгьуну бур ниттил ххуллу, чIивиманал тIурча – буттал ххуллу. ДакIнийхтунусса жижара буллай буру Абакардул кулпатрахь, арсваврахь, щалагу агьлу-авладрахь. Цал рухI хъинний дишиннав, Алжаннул ххари аннав!
Хъусращиял жяматрал
цIания Зулайхат Тахакьаева
