Декабрьданул 14-нний ДР-лул шяраваллил хозяйствалул ва бакIлахъиялул министр Абзагьир ХIусайнов ва Республикалул промышленностьрал ва машлул министр Батир Эмеев хьунабавкьунни хъунисса ттучаннал каялувчитуращал (ритейлтуращал). Миннал ххал бивгьунни агьалинан чара бакъа аьркинсса дукиялул сурсатирттал багьри лахъ шаву дацIан дувансса чараннал масъала.
«Министерстварттал каялувчитурал ритейлтурахь бувсунни агьалинан чара бакъа аьркинсса дукиялул сурсатру ласаван аьркинну бушиву циняв ттучанну цачIун хьуну. Мунийну бакIлахъиялул заллухъруннаща бюхъантIиссар сурсатру цащара шайссаксса кьюркьуну дахлан.
Масалдаран, гречка Алтай Республикалия транспортрахлусса харж буккаврийну гьарца ттучандалун личIину хъиннува ххирану бацIлацIиссар, циняв ттучаннал цачIуну ласлайнияр. Министерстварттал тIурча, Алтайнал хъузалтращал дахIаву дурну, машварартту бантIиссар сурсатру ссан ласун бюхъантIиссарив», – тIий бур республикалул Минсельхозпродрал прессалул къуллугърал баяндалий.
Мунияр ххишалагу, цIушинал кьинирдал хьхьичIсса гьантрай, республикалул гьарца шагьрулий хьунтIий дур дукиялул сурсатирттал ва бакIлахъиялул ярмукIартту. Миннуй Дагъусттаннал хъузалтрал цалла бакIлахъия дахлантIий бур базардавунияр кьюркьуну.
