ЧIарамур ник – жулва ялун бучIанмурди

Ххуллункьини МахIачкъалалив, Расул ХIамзатовлул цIанийсса Национал библиотекалий, дуклаки оьрчIащал хьунабавкьунни машгьурсса спортсментал, хIакинтал, шагьрулул администрациялул ва рувхIанийсса идарарттал вакилтал. Шикку гьур­тту хьунни Дагъусттаннал муфтинал хъиривчу МухIаммад Майранов, UFSданди буккавурттал спортсмен Рамазан Эмеев, ММА спортрал чемпион МахIаммад Жабраилов, кикбоксинграл тренер МахIаммадкарим Арсланбагов, лавайсса категориялул хIакин Сабир Исмяилов, Шагьрулул Мажлисрал депутат Арслан ХIасанов, «Молодежь города Махачкалы» ДРОО-лул каялувчи Шамил ХIасанхIусайнов, шагьрулул 15-мур, 42-мур, 49-мур школарттал, «Лидер» ва Насир ХIажихановлул цIанийсса спорт школардал чIава спортсментал ва дуклаки оьрчIру.


[dropcap]М[/dropcap]ероприятиялул сиптачину хьунни Дагъусттаннал панкратиондалул цачIун дур командалул хъунама тренер, шагьрулул 49-мур школалул директор Аьвдулкарин Айгунов.
КIицI лаганну ва мероприятие щаллу хьушиву коронавирусрал инфекциялия буруччаву мурадрайсса тIалавшиннардугу кьянкьану биттур дурну.
Мероприятиялийн бувкIсса бусравсса хъамаллурахь ва дуклаки оьрчIахь барчаллагь увкунни Аьвдулкарин Айгуновлул.

– ХIакьину дуклаки оьрчIащал хьунабакьин, миннахь насихIатру бусан оьвкуссия жагьилтурал дянив сийлийсса, цIанихсса спортсментурайн, машгьурсса хIакинтурайн ва рувхIанийсса идарарттал вакилтурайн. Ва мероприятие сакин даврил мураднугу хъанахъиссар, оьрчIрув, зу, хьхьичIун ливчусса, бусравсса инсантурая эбрат ларсун, оьрмулул ххуллий язи бувгьусса хияллу дузрайн буккан баву. Ттун хъинну ччива зуятугу халкьуннан бусравсса, хайр бусса инсантал хьуну. Умуд бур ва хьунабакьавугу зун мюнпатрансса хьунссар тIисса, – увкунни Аьвдулкариннул.


Хъунма хIал къавхьунни зун гъирагу, шавкьгу, даврил опытгу бу­сса жагьилсса пишакар Аьвдулкарин Айгуновлуйн шагьрулул 49-мур школалул директоршиву дан вихшала дурну.


[dropcap]Ш[/dropcap]иккува кIицI лаган, хъунма хIал къавхьунни зун гъирагу, шавкьгу, даврил опытгу бу­сса жагьилсса пишакар Аьвдулкарин Айгуновлуйн шагьрулул 49-мур школалул директоршиву дан вихшала дурну. ХIакьинусса кьини ва школалий, Аьвдулкариннул каялувшиндаралу, дачин дурну дур оьрчIру тарбия баву мурадрайсса диял­сса давуртту.
Цала оьрмулия ва спортраву дурсса хьхьичIуннайшивурттая дуклаки оьрчIахь бувсунни жагьилтурал дянив сийлийсса UFS спортрал лачIунукку Рамазан Эмеевлул.
– Барчаллагь тIий ура шиккун бувкIсса дуклаки оьрчIахь ва бусравсса хъамаллурахь.

[dropcap]Н[/dropcap]а хъуна хьуну ура зунттаву, мунияту аьдат хьуну ура зий, захIмат буллай. ЧIун-чIумуй, утту­гу ивхьуну, кIюрххицIунмайсса чакгу бувну, гихуннай дуллансса даврил план сакин дара. ЦIанакул чялишну хIадур хъанай ура январь зурул 17-нний Абу-Дабилив Дэвид Завадо тIисса Германнал чемпионнащал данди уккан. ТтуцIун гьарца ишираву кабакьу буллай, гьавас бутлай, мудангу буссар ттул нину-ппу ва хъуними уссурвал. ОьрчIрув, ттул зухь хъунмасса миннатри, вичIи дирхьуну бикIияра ва хIурмат-кьимат бара зула нитти-буттал ва лагма-ялттуминнал. КIулну бикIияра, ччан бикIарчан, дан къашайсса цичIар дакъашиву, – увкунни Рамазаннул.

Хъирив ихтилат бунни лавайсса категориялул хIакин, къюкIлил сосудирттал хирург, Дагъусттаннай акъассагу, Аьра­сатнавугу машгьурсса Сабир Исмяиловлул.
– ХIакьину, зул ихтилатирттах вичIи дирхьуну, хьхьичI дарцIунни ттулла оьрчIшиву. Зунма чIалачIисса куццуй, цавай машгьур хьуну бур медициналуву, цавайгу спортраву. Шиккугу кIицI лаган ччива ттун цимурца оьрмулувусса хьхьичIуннайшивуртту жулва нитти-буттал бувсса захIматрал хIасиллу хъанахъишиву.

Махъсса ппурттуву щалла дунияллийх кьини дуккан дунни оьхIалсса коронавирусрал инфекциялул. ХIакин хIисаврай на миннат буллай ура, медициналул ккаккан дурсса цинярда тIалавшиннардугу биттур дуллай, зула мюхчаншиву дуруччаврил ялув кьянкьану бацIаву.

Цуксса кьурчIинугу, кьюлтIсса зат бакъар ва рахIму бакъасса азарданул инсантал кьатI бувну най бушиву. Мунияту ттун ччива зуятугу инсантуран хайр-мюнпат бусса лайкьсса пишакартал хьуну. Медициналул, кIулшивуртту дулаврил ва спортрал арарду цанния ца личIи дан къабучIисса дур. Мугу циваннив къабувчIлачIисса зат бакъар, – увкунни Сабирдул.

[dropcap]М[/dropcap]ероприятиялий жагьилтурахь насихIатру бусласи­сса ихтилатру бунни мукунма МахIаммад Майрановлул, Арслан ХIасановлул ва Шамил ХIасан-ХIусайновлул.
Чялишсса гьурттушинна дур­сса дуклаки оьрчIан дуллунни дакIний личIансса бахшишру.