Декабрь зурул ххюнний Къиримнаву, Журавки тIисса шяраву, лётчик- испытательтуран хас дурсса мемориалданул комплекс тIивтIунни. Ти­кку Як-38 самолётгу, бусалардавун багьсса лётчиктурал – Совет Союзрал Вирттаврал Валерий Чкаловлул ва АхIмад-Хан Султаннул бюстругу бацIан бунни. Гьайкал тIитIаврил шадлугърай гьуртту хьунни хIукуматрал къуллугъчитал, аьрали частирдал командиртал, жяматийсса ккураннал вакилтал, дуклаки оьрчIру.