МахIачкъала шагьрулул Ленинский райондалул ялув бацIаврил ва профилактикалул даврил кIилчинмур отделданул (ГУ МЧС РФ по РД) зузалтрал цала биялдарайсса райондалий буллай бур ЦIусса шинал байрандалуцIун бавхIусса профилактикалул операция.
Ванил мурад бур чIявусса инсантал бавтIун ЦIусса шинал байранну дайсса кIанттурду, мукунма пиротехникалул затру дахлахисса кIанттурду цIарая мюхчан баву. Операциялул лагрулий ххал бан тIий бур чIявусса инсантал ва мюрщисса оьрчIру гьурттуну ЦIусса шинал байрандалул мажлисру байсса ва пиротехника дахлахисса кIанттурду.
Ххалбигьавуртту дуллалиминнал ххишаласса къулагъас дан тIий дур ЦIусса шинал ёлкарду бишинтIисса къатраву цIарая мюхчан хьунсса чаран лявкъуну бурив, дурурччуну дурив цIарая мюхчан шаврил тIалавшиннарду, ххал дан тIий дур цукунсса дурив кьатIув буккайсса ххуллурдал тагьар, дузалну бурив цIу лещан дан канилу дикIан аьркинмунил, дурив, цIу лачIурча, леххаву рутансса сигнализация, укунсса чIумал инсантал кьатIув буккан бансса план.
Мукунма ххал бан тIий бур персоналданун ва жаваблувсса инсантуран кIулну бурив цIу ларчIсса тагьарданий занакьулу бикIан.
Виваллил иширттал отделданул зузалтращал архIал дан тIий бур пиротехника ядуллалисса ва дахлахисса кIанттурду кIул бансса рейдру.
Ххалбигьавуртту дурну махъ, хьунадаркьусса диялдакъашивуртту дукьан дансса чаран лякъин тIий бур.
И. Аьбдуллаев, виваллил къуллугърал
хъунама лейтенант
