Дагъусттаннай коронавирусрал хъирив лаявуртту дуллан бувкIун бур Гамалейл цIанийсса эпидемиологиялул ва микробиологиялул элму ахттар дайсса институтрал пишакартал.
ХIакьинусса кьининийн вайннал хъирив лаявуртту дурну дур МахIачкъала, Каспийск, Избербаш шагьрурдай, COVID-19 хъин дуллалисса арулва стационарданий. Ххал бивгьуну бур лабораториялул къуллугъру.
ДР-лул цIуллу-сагъшиву дуруччаврил министр Жамалуттин ХIажиибрагьимовлущалсса хьунабакьаврий Гамалейл цIанийсса институтрал лабораториялул каялувчи Эдуард Карамовлул кIицI лавгунни Дагъусттаннай хьхьичIунсса даражалий дуллай бушиву коронавирусрал хъирив лаявуртту.
Билаятрал хьхьичIунсса инфекционистурал кIицI лавгунни республикалий медициналул пишакартал хIадур баврил даву лавайсса даражалий душиву.
Министрнал кIицI лавгунни федерал экспертътурал гьарцагу аьрххилия жула хIакинтуран хъунмасса лябукку бушиву. Коронавирусрал инфекциялущал таланшиврул гьарца кьини кIулшивуртту ларай дуллан багьлай бушиврий чIурчIав дуллай, министрнал бувсунни НИИ-лущал икьрал дурну душиву жула хIакинтурал пишакаршиву ларай дуллан.
