«Дагестан» РИА-лий хьусса пресс-конференциялий ДР-лул промышленностьрал ва машлул министр Батыр Эмеевлул бувсунни, коронавирусрал инфекциялул къашайшиву щала дунияллий лахъ хъанай дайдишаврийн бувну, цIунилгу кIура баен багьлай бушиву ссуссукьушиннардал чараннайн.
«Азарданул цалчинсса щатIи бацIан бан бювхъуссар ссуссукьушиннардал кумаграйну. Амма ми ссуссукьушиннардал чIиримур бизнесран биян бан нанисса зарал чIалай, жу хIарачат буллай буру ми ссуссукьушиннарду дуван так дукъарну чара бакъасса кIанттурдай», – увкунни Эмеевлул.
Балжийну ванал бувсунни банкетный заллал даврия. «Цинявппа банкетный заллаву дезинфекциялул давуртту дуллай, хьулуву каруннийн пурх чайсса затру ишла дуллай бухьурчагу, къабюхълай бур яла чанну кIиттурша инсан, ца-ца чIумал тIурча, азара-азаллий кIиттуршагума автIсса кIанттурдай я маскардаву щябикIан, ягу манзилданул архну бацIан»,– увкунни министрнал.
Гьарца мудан ЦIусса шинал хьунийн дукиялийнсса маша ххи шаву хIисавравун лавсун, Батыр Эмеевлул кIицI лавгунни мукунсса тагьардануву коронавирусрал инфекция ппив шавриясса нигьачIаву хъуннасса душиву.
Машлул сетирдан ванал маслихIат бунни хъунисса ттучанну зузи бан хьхьу-кьини дакъа, сакин бан маркетинграл акцияртту ва миннуя бусласисса даву.
Коронавирусрал инфекциялул тагьар билаятрал цайми регионнай цукунсса дуссарив ва му ппив хьун къаританшиврул ци чаранну ляхълай буссарив бувсунни Минпромторграл машлул ва базардал даврилсса буллалисса управлениялул каялувчи Эльдар Аьлиевлул.
Азар ппив шаву лахъ хъанай дусса дур 33 региондалий. Яла чIявусса къашавайми бусса бур 13 региондалий: Сахалиннал, Ульяновскаллал, Костромскаллал, Иркутскаллал, Пензенскаллал областирдай; Хакасиянал, Комиллал ва Забайкаллал крайрдай; Къарачай-Чаргаснал, Кабардин-Балкьарнал, Ингушнал республикарттай.
Ванал кIицI лавгунни октябрь зурул 27-нния шинмай Аьрасатнаву щуруй дайдирхьушиву Роспотребнадзорданул тIалав дуллалисса ссуссукьушиннарду – аьрасатлувтал буржлув буллай бур ххюцIала инсаннаяр ххишаласса усса кIанттурдай маскарду лахлан.
