Вай гьантрай Аьрасатнал ПаччахIлугърал Думалул депутат Аьбдулмажид МахIрамовлул ирглийсса даврил аьрххи хьунни ЦIунтIиннал, ЦIумадиял районнайн ва БежтIиннал участокрайн. Ванияр хьхьичIгу депутат лавгссия Агъуллал райондалийсса агьалинащал хьунаакьин.
Зунттал щархъайнсса аьрххилий МахIрамов цалчин хьунаавкьунни БежтIиннал жяматращал. Депутатнахь вайннал кIицI лаглай бия яла цIюрувкьуми — ххуллурду баврил ва бакьин баврил, ттукIрал дузалшиндарал, медициналул персонал биялну бакъашиврул, коронавирусрал инфекциялул къашавай хьусса инсантурансса медикаментру ва анавар кумаграл машинартту биялну бакъашиврул хIакъиравусса масъалартту. Участокрай зузисса хIакинтурал депутатнан ккаккан дунни медициналул оборудование дух хьуну душиву ва тавакъю бунни цIусса обрудование ласун кумаг баврицIун кабакьаву.
Аьбдулмажид МахIрамовлул махъ буллунни жяматрал сукку бувсса масъалартту дузрайн буккан баврил ялув ацIансса.
ЦIунтIиннал райондалий МахIрамов ивунни райондалул азарханалийн, ххал диргьунни кIиккусса тагьар, кьимат бивщунни хIакинтурал даврин ва цIухху-бусуртту бунни къашайшалтрахь.
Хъирив азарханалул актовый залдануву депутат хьунаавкьунни хIакинтуращал. Депутатнал бувсунни федерал центрданул бюджетрава амбулаториярттайн коронавирус хъин дуллансса цинявппа даруртту уква итабакьлай бушиву ва ми чара бакъа агьалиначIан биян аьркиншиву.
ЦIунтIиннал райадминистрациялийгу Аьбдулмажид МахIрамовлул кьамул бунни агьали, вичIи дирхьунни миннал тIутIимуних ва тIалав буллалимуних. Гьарица сукку бувсса масъалалул хIакъираву депутатнал бунни хасъсса маслихIатру, бувсунни ми дузал баврил ялув ацIантIишиву.
Муния махъ ЦIумадиял райондалул бакIчи АнвархIажи Вечедовлущал архIал агьали кьамул бувну, вичIи дирхьунни миннал масъаларттахгу.
Райондалул бакIчинал Аьбдулмажид МахIрамовлухь барчаллагь увкунни, коронавирусрацIун дархIуну хIасул хьусса захIматсса тагьарданухгу къаурувгун, зунттал щархъавусса агьалинах дурсса къулгъасрахлу.
