Вай гьантрай МахIачкъалалив хьунни «Абилимпикс» тIисса региондалул IV-мур чемпионатрай пишардал усттаршиву ккаккан давриву ххув хьуссса гьурттучитал барча буллалисса шадлугърал даражалийсса мажлис.
Республикалий ноябрь зурул 10-нния 14-ннийн бияннин манзилданул режимрай най дуссия цIуллу-сагъшиврул ссуссукьушиву думиннал дянивсса пишардал магьиршиву ккаккан дуллалисса «Абилимпикс» тIисса цIанилусса чемпионат. Мукьва гьантлул мутталий 13 журасса пишардал усттаршиву ккаккан дуллалисса бяст-ччаллу хьуссар МахIачкъалалив ва Хасавюртрай. Вайннуву гьуртту хьуссар сайки 70 гьурттучи, 87 эксперт ва 20 волонтер.
Му бакъассагу, Дагъусттаннал цачIундур команда гьуртту хьуссар республикалийсса пишардал кIулшивуртту дулайсса идарарттай манзилданул режимрай, ноябрь зурул 23-29-нний най диркIсса Миллатирттал VI-мур «Абилимпикс» чемпионатрай. Вай бяст-ччаллаву 9 журасса пишардал усттаршиву ккаккан давриву гьуртту хьуссар 9 инсан.
13 журасса пишардал усттаршиву ккаккан дуллалисса бяст-ччаллаву гьуртту хьуссар сайки 70 гьурттучи, 87 эксперт
ва 20 волонтер.
Региондалий хьусса чемпионатрай «Веб-дизайн» тIимур номинациялуву «Пишакартал» тIимур бутIуву ххув хьунни ДГУ-рал информатикалул ва информациярттал технологиярттал факультетрал 2-мур курсирал студент Асеф Эсадуллаев. Ванан дуллунни «Абилимпикс» чемпионатрал диплом, медаль ва «Визаж-холл» компаниялул чулухасса арцуйнусса бахшиш.
Республикалул ЗахIматрал ва социал хьхьичIуннайшивурттал министерствалул жагьилтал давурттал дузал байсса «Успех» т1исса центрданул пишакартурал кIицI лавгунни ВУЗ-рдал, ССУЗ-рдал ва колледжирттал студентътурал чялишсса гьурттушинна ва хьхьичIунсса ккаккияртту хьун дуллай бушиву «Абилимпикс» чемпионатирттай. Хаснува вай суккушиннардивух хьхьичIунну гьуртту хъанай бур пишарду лахьхьин баврил кIулшивуртту дулайсса идарартту.
Пишардал магьиршиву ккаккан давриву ххув хьусса гьурттучитал барча бунни ва гихунмайсса бяст-ччаллаву тIайлабацIуртту чIа увкунни Республикалул захIматрал ва социал хьхьичIуннайшивурттал министр Изумруд МухIуттиновал.
«Абилимпикс» хъанахъиссар захIматрал пишарду язи бугьан ва машгьур бан кумаг буллалисса коммерческий дакъасса суккушинна. Чемпионатрал кумаграйну, мушакъатшиву дусса цикссагу жагьилсса, гьунар бусса пишакартал тIалавну бушиву тасттикь хьунни Аьрасатнал хьхьичIунсса ва хъунисса предприятиярттай. ЦIуллу-сагъшиврул ссуссукьушиву думиннал дянив «Абилимпикс» чемпионат машгьурну душиву исват хъанай бур шиная шинайн гьуртту хьун ччисса пишакартал гьарза шаврийн бувну.
