Муфтиятрал бахшиш дуллунни Хасавюртлив цилва ххуллийх нанисса душ бацин къабивтсса къучагънан. Ва муфтиятрал просвещениялул отделданул сотрудник Усман Щайхов ур. Муфтинал АхIмад Апандинал цIанияту ванал хъиривчу Аьбдулла Аджималлаевлул, ХIусманнун дакIний личIансса бахшишгу дуллуну, барчаллагь кунни жагьилтуран эбратну хьунсса чувшиврухлу. Цаппара гьантрал хьхьичI дарсирдая шаппай нанисса, Башларовлул цIанийсса медициналул колледжраву дуклакисса студентдушнил хъирив лавну шама жагьил, му машиналувун ххюрхху бувансса хIарачат буллай бивкIун бур.
Му иш хавар хьуну бур колледжравун лекция буккин нанисса ХIусманнун. Гассят машиналува увккун, душ бацлацисса жагьилтурачIан ххявххун, ванаща бювхъуну бур душ миннаща зеххин ва ххассал буван. Чурххал битавсса, спортраву итххявхсса ХIусманнущал къалавну ур шама жагьил. Душнил гъан-маччами виричусса тIул дурсса багьадурайн барчаллагьрай бур. Цува ХIусманма, цал цичIав виричушиву къадував, гьарца иман дусса чувнал буван аьркинмур бував тIий ур.
