ХIакьину жула агьалинал зума-мазрайсса, буруккин хIаласса затну бур Къучагъшиврул ордендалул кавалер, генерал Муслим Даххаевлул хIакъираву хъанахъимур.
2019-ку шинал декабрь зурул 13-нний Ростовуллал областьрал ФСИН-далул Агьаммур управлениялул хъунама Муслим Даххаев увгьуссия ПаччахIлугърал кьюлтI буллалимур ашкара бувшиврий щак тIий.
Октябрь зурул 2-нний Ростов-на-Дону шагьрулул Ленинский судрал хIукму бувссия му кIира шинай колония-поселениялий итан. Шиву бувсса гьантри хIисав бувну, Муслим Даххаев уккан аьркинссия 2020-ку шинал ноябрь зурул 13-нний. Амма итаакьин ца нюжмар лирчIсса чIумал ванай цамур тахсир бивхьунни. Даххаев, къуллугърал каши ишла дурну, дуснакьлувтал цала шардасса давуртту дуллали бувну ивкIссар тIисса.
Амма ванал зузи увну ивкIссар тIисса ряхагу инсаннава цанналагу му зат мяйжан къабунни.
ЦIуну сукку дурсса уголов делолийн бувну, МахIачкъалаллал Советский райондалул судрал Даххаев кIива зуруй дуснакь ансса хIукму бунни. Муния шинмай, ноябрь зурул 12-нния декабрь зурул 1-ннийн бияннин, Даххаев чув уссарив кIулну бакъашиврул инсантуравун хъиннува аваза бувтунни. Так «Блокнот» изданиялул ваная ятIа-тIар бакъашиврул хавар бивщуну махъ, Даххаев МахIачкъалаливсса СИЗО-лийн увцуну бувкIун бур.
Муслимлун хъанахъимунил, ванай бихьлахьимунил хъирив лаян бюхълай бакъар.
– ПIякь бивкIун чIалай бур Муслим дуснакь аву щил-дунугу тIалавшинна душиву ва мунин ччимур багьана ляхълай бушиву, – тIий бур ванал адвокатътал.
Уттигу Муслимлуй бишинмур къалякъирча, ва январь зурул 12-нний уккан аьркинссар.
Къалякъинхьуви.
