Коронавирусрал пандемиялуцIун дархIусса къадагъа сававну ххирасса тамашачитурая батIулну биялсса мутта лавгун махъ Лакрал театр тIитIлай бур 85-мур сезон.

ТIитIлайгу бур му дунияллул классикалийну – хъунасса Шекспирдул «Тарс мютIи баву» тIисса къямадиялул премьералийну. Пьеса лакку мазрайн бувцуну бур Сулайман Мусаевлул. Премьера ккаккан буллай бур лакку мазрай ва оьрус мазрай.

Спектакль бишин учIан увну ур, цува жагьилсса ухьурчагу, Шекспирдул творчествалущал зузаврил биялсса опыт бусса режиссер, В. Тхапсаевлул цIанийсса Ухссавнил АьсатIиннал паччахIлугърал академический театрданул хъунама режиссер Гиви Валиев. Цувгу ттигъанну ивтун ур ва театрданул каялувчину.

---

Гьунар бусса актер 30 шинал оьрмулуву лайкь хьуну ур Ухссавнил АьсатIиннал ва Кабардин-Балкьарнал лайкь хьусса артистнал цIардан.
Ччянива Гивил ппухълу Кьиблалул АьсатIиннава бивзун бур Гуржиянавун. Махъ нину-ппу бивзун бур Ттуплислив. 1990 шинал, гуржиял националистурал аьсатIиннащал питна байбишайхту, думур ду-дунийра кьариртун, Валиевхъал кулпатран ца хьхьу-кьинилул дянив бизан багьну бур Ухссавнил АьсатIиннал Цалык тIисса шяравун. Та чIумал Гивин диркIун дур арулла шин.
Школа къуртал бувну махъ Гиви дуклан увххун ур Ухссавнил АьсатIиннал паччахIлугърал университетрал актертал хIадур байсса факультетрайн.

Му къуртал байхту, дахIалай чинну лахъ хъанай дарчуну дур гьунар бусса актернал карьера. Кьуния цара шинал оьрмулуву Гоголлул «Ревизор» спектакльдануву дургьусса Хлестаковлул рольданухлу лайкь хьуну ур «За лучшую мужскую роль» цIанин «Сцена без границ» тIисса Дунияллул халкьуннал дянивсса миллатирттал театрдал фестивальданий.

ТIайлабацIусса хьуну дур Сигизмундлул роль Кальдероннул «Жизнь есть сон» пьесалуву, Жадовлул роль Островскийл «Доходное место» пьесалуву. Амма халкьуннан бунияла ххирагу хьуну, Ухссавнил Ккавкказнал театрал ккурандалул дянив машгьургу хьуну ур Гиви Георгий Хугаевлул «Черная бурка» тIисса пьесалуву хIухчил ккаччил Тузардул роль дургьуну махъ. Ва рольданухлу актер хьуну ур шанна театрал фестивальданул лауреат: «Кавказский Меловой круг» Адыгейнаву, «Южная сцена» Кабардин-Балкьарнаву ва «Театральная маска» Ухссавнил АьсатIиннаву.

ЧIун чIарах дукканнин Гиви Валиевлул цIа машгьур хьуну дур режиссер хIисаврайгу. ГИТИС-раву дуклай унува ванал бивхьусса цалчинсса спектакль «Прощай, овраг!» лараймур бахшишран лайкь хьуну бур «Сцена без границ» фестивальданий. ХьхьичIунсса давур­ттан ккаллисса бур спектакллу «Названные братья», «Генералы в юбках», «Кровавая свадьба», «Ромео и Джульетта», «Ричард III».
Арулла хьхьуну аншлаграй хьуну бур март зуруй «Ричард III» спектакльданул премьера. ХьхьичIунсса ххуттай кIицI лавгунни ва спектакль ттигъанну Грозныйлий хьусса «Федерация» тIисса щалвагу Аьрасатнал миллатирттал театрдал фестивальданий.

КIура баенну Гиви Валиевлул Лакрал театрдануву бихьлахьисса спектакльданийн.
Хаварбакъулий къаагьхьун­ссар режиссер жула театрданийн бакIрайн. Ттун ванал творчествалуву Лакрал театрданущал рувхIанийсса маччашиву хIисав хьунни. Лакрал театрданун кунна, ванангу ххирар Ф. Лоркал ва У. Шекспирдул творчество.

– Гиви Давидович, буси цукун бакIрайн агьра ина Дагъусттаннайн, Лакрал театрданувун?
– На увкIра Лакрал театрданул каялувчи Бадрижат Набиевнал оьвкуну. Ванил ттун маслихIат бувна Ххувшаврил 75 шинал юбилейрайн Чингиз Айтматовлул пьесалиясса «Материнское поле» спектакль бишин. Пандемия сававну, ва мурад чулийн къабувккукун, маслихIат бувна Шекспирдул «Укрощение строптивой» бишин.

На ххарину рязи хьура. Цанчирча, Лакрал театр хIакьину кIулссар щалва Ухссавнил Ккав­кказнаву ва му хьхьичIунсса ххуттай буссар. ДакIния къалагайсса асарду ливчIуна ттул дакIниву «Сцена без границ» фестивальданий «Бернардо Альбал къа­тта» спектакль ххал бувния махъ. Багьавай бюхттул­сса кьиматгу бивщуна му спектакльданун. Муния махъ хъинну ххуй бивзуна гастроллай бувкIсса «Ромео и Джульетта» спектакль.

Муния махъ жу хьунабакьайвав личIи-личIисса фестиваллай. Цирив ца рувхIанийсса гъаншиву, творчествалийнусса маччашиву асар хъанан дикIайва мудангу ттул дакIниву Лакрал театрданул чулухуннай.

Хъунмасса тIайлабацIу хьу­ссар тIиссара ттунма оьрмулувугу, творчествалувугу Лакрал театрданущал зун нясивну ля­къаву. На кIул хьура ххаллилсса, даврихух лавгсса труппалущал, аьсатIиннал тамашачинан ххуйну кIугу- кIулсса, ххигу-ххирасса труппалущал.

– Цукунсса асардащал зий ура, туну, ина жул театрдануву?
– Гъирарай. Театрданувун учIайхту, ттун цалчин ссай дакI даркьуна учирча, бунияла­сса пахру бан лайкьсса репертуар бушиврий. ХьхьичIххуттай классика бушиврий – кьатIаллил билаятиртталсса хьуннав, оьрусналсса хьуннав, миллатралсса хьуннав. Дунияллул хьхьичIунсса классиктурал произведениярттайн ка лаян хъунисса театрдувагу нажагьсса бакъа къасислайсса чIумал, чIивисса миллатрал театр жапасса шартIирдавугума шамилчингу хъит тIий бур Шекспирдул бюхттулшиврийн гъан хьун. Мунива чIалай бур театрданул ялув гьунттийсса бучIантIимунил буруккин бусса, аькьилсса каялувчи ушиву.

Хъунмасса тIайлабацIур каялувчинал чIарав мукунма аькьил­сса, цила даву кIулсса завлит бушиву. Гулизар АхIмадовная ва Бадрижат Набиевная хIасул хьуну дур хъинну интеллигентсса, репертуар цила багьайкун язи дугьан бюхъайсса творческий тандэм.

Ттизаманнул шартIирдаву так ца миллатрал драматургиялийну театр хьхьичIунмай бан къабюхъайссар, хаснура миллатрал драматургия ссуссукьу­сса чIумал.
Ттул дакIнин хъинну гъан­сса бур Шекспирдул замана ва тема. Шекспирдул творчество – олимпиадалул ххуллийссар. Ух хьурчагума, мунийн ка лаявура тIайлабацIулун ккаллисса. Творчествалул инсаннан Шекспир – асардал океанни, хIавчIун къуртал къашайсса, я зума, я чIан лякъин къашайсса. Ччимур заманнай агьамсса, ттизаманнул журалийгу, миллатрал журалийгу бишин бюхъайсса.

– Спектакль лакку мазрай бишин захIматшиву хьунадакьлай дакъаяв?
– Гьай-гьай, къабигьассар щилчIав шагьрулийн увкIун щилчIав халкьуннащал зун. Амма ттун захIматшиву хьунакъадаркьунни, цанчирча, ттул чIарав кумагчитал бия: театрданул каялувчи, завлит, хъунама режиссер. На дакIнийхтуну барчаллагьрай ура Аслан Садикьовичлуйн, репетицияртту наниссаксса хIаллай ттуща гьарца кьини шийх зун бюхълай бакъахьувкун, хъуннасса хъар цайнна ларсун зий ия. Ванан кIулли актернащал зун. Му бакъассагу, Аслан ур инсан хIисаврайгу, пишакар хIисаврайгу ттул дакIнин маччасса инсан.

– Спектакльданул ху­дожник-постановщик ва костюмирттал автор бур вил кулпат Лариса Валиева?
– Жула театрдануву уттинин на бивхьусса спектакллал художник-постановщик Ларисар. Мунияту щиннияргу ттула маз ва дакI дурчIайсса, му ба­къассагу, Шекспирдул произведениярттансса декорацияртту ва костюмру щаллу дурсса пишакар чIарав уний, цаманах луглансса чарабакъашиву дакъая.

– Цукунсса хьуна инава актернал пиша язи бугьансса савав?
– ТIайламур бусан, на ияв театрдания ятсса инсан. Архсса шяраву ялапар хъанай бухьувкун, театрданувун бучIансса сантгу къадикIайва. Актернал пиша язи бугьан дакIний-мазрайвагу ча бикIанссия.

Амма цума-цагу чув дунияллийн уклай ур цала оьрмулул кодращал, ххуллущал. Кьадарданул га ка дургьуну увцуну най ур цала ххуллийх.
2000-ку шиннардил дайдихьулий хъинну машгьурну дия КВН, «Владикавказские спасатели» командалуву уссияв 11-мур классраву дуклакисса нагу. Жунна ришлашисса хъатру ххуй дирзун, ттувун цирив ца зуву дагьуна актер хьунсса.

Нава цалчин театрданувун увкIссара актерский отделениялул цалчинмур курсирай дуклакисса чIумал «Сцена без границ» фестивальданий Кабардиннал театрданул спектакль «Царь Эдип» ххал бан. Вих хьу, га спектакльданулшиврий на хьхьу кьатIув руртссар, автобусрайн чIал хьуну. Дяркъусса хьхьу! Эшкьи къархьуну дикIайссияв яла ттун театрданух! Гания шинмай театр хьуссар ттул оьрмулул ца бутIа.

Театрданул инсан аххана ай­ссар, рувхIанийну марцI ­уккан айссар. Театр – му ярагъри. ЩищачIав я лаласун, я хъирив лаян къабювхъусса, так Совет Союзраща личIаннин.
ХIакьину ттун ттула оьрму театрдания ябувцун чIалай ба­къар.

Дипломный спектакльдания махъ на най унува кьамул увнав театрданувун. Актернал давриву ттун тIайлабацIу хъанай бавчукун, ттунна цирив диял къахъанахъисса асардал на режиссер пишалийн кIункIу увнав. Дуклан увхра билаятрал ца яла хьхьичIунмур институтран ккаллисса ГИТИС-равун. Тиккугу ттун тIайлабацIу хьуна хьхьичIунсса усттартурачIа дуклан — Михаил Захарович ЛивитиннучIа ва Михаил Иванович ФилиповлучIа.

– ХIакьину вил цIа машгьурну дур актершиврийгу, режиссершиврийгу. Миннува винма цумур пиша ххирар?
– Режиссер – ттул кIилчинмур пишари. Цалчин на язи бувгьумур пиша – актерди. Бусса оьрмулий актернува лигу-личIантIиссара. Амма ххуй­сса режиссер хьуншиврул битан аьркинссар ххуйсса актершиврул ххуллу.

– Ци чIа учинна ина Лакрал театрданун?
– Дахьа театрданувун увкIун, цалчин актертал ххал хьусса чIумал на увкуссия: «На шихун дустурах луглай увкIра», – куну. Вихнугу уссияв ттунма ччийкун хьунтIишиврийн. Гьарца цIусса кьини инсаннал хIарачат бан аьркинссар цана дус ля­къин. Лакрал театрдануву ттун лявкъунни чIявусса дустал. Дустал хIисаврайгу, пишакартал хIисаврайгу ххаллилсса инсантал бур.
На чIа тIий ура ва театрданун цила магъи. Щалва Ухссавнил Ккавкказнаву Лакрал театр кIулссар ва хьхьичIунсса хху­ттай буссар.

Ттул кIулшилуща лаласун бюхълай бакъар цукун ливчIссар, так цала республикалий бакъасса, щалва Ух­ссавнил Ккавкказнаву ца яла хьхьичIунсса театр бусса оьрмулий цила къатри бакъа? Лакрал театрданул творчествалул потенциал хъунмасса бур, кьаст лахIарча, цала тIимур бан бю­хъайсса. Цивппа заллусса къатри хьурча, миннал хъару лапра тIитIинтIиссар! Цанчирча инсан цала ужагърай куна чувчIав къаикIайссар.
Лакрал тамашачитурайн лаизавияв, буруччияра зула театр тIий! Мяйжаннугу зул театр пахру бан лайкьсса театр бур.

Федерико Гарсия Лоркал театр ккалли бувну бур барометралун, миллат багьаврил ягу бизаврил лишанну хъанахъисса. «ЛичIлулсса театрдануща чIирисса чIумул дянив бюхъантIиссар миллатрал асарду баххана бан, аьйплусса театрданул тIурча, миллат шанаши бантIиссар», – куну бур цIанихсса шаэрнал. Лакрал театр личIлулсса театр бур. Амма театрданун миллатрал чулухагу кумаг бикIан аьркинссар. Театрданун кумаграл ка тIитIин къашайсса миллат — му ягу бивкIусса миллатри, ягу рухI дуллалисса.

– Барчаллагь хъунма­сса, Гиви Давидович, аьчух­сса ихтилатрахлугу, Лакрал театрдануву бувсса захIматрахлугу! Винмагу, театрданунгу тIайлабацIусса хьуннав вил жучIансса ша!

Ихтилат бувссар
Зулайхат Тахакьаевал