ХIурмат бусса аьрасатлувтал, дагъусттанлувтал!
На, арулва оьрчI тарбия був­сса нину, цIа дурксса аьрали генерал Муслим Даххаевлул бава, Аминат, хIакьину, жула кулпатрайх кьини дурксса чIумал, лабизлай бура зуйн, жула чIарав бацIияра тIий. Ттун къакIула чIярусса аьра­ли лайкьшивуртту дусса ттула арснал бакIрачIан укунсса кьини дучIаншиву.

Жунна цинявннан ххуйну дакIнийссар жула билаятран, хаснува Дагъусттаннан, захIматсса кьинирду лахълан багьсса 1999- ку шин. Та чIумал «терроризм» тIисса лухIи бала бивуна жула халкьуннал ялун. 1999-ку шинал сентябрь зуруй хьусса дяъвилул иширттал кьурчIисса лажин чирчунни жула тарихраву.Тай захIматсса гьантрай ляличIисса къучагъшиву ккаккан дурна Дагъусттаннал милицанал зузалтрал. Зун дакIнийссар цуксса хъунна­сса хъар лахъан багьссарив таний ттул арснал каялувшиндаралусса ЦIуссалакрал райондалул виваллил иширттал отделданул зузалтран. Милицалтрал чIирисса кьюкьлун данди бацIан багьссия цукссагу гуж ххисса къачагътурайн. Цала оьр­мурдан хъунна­сса нигьачIаву ду­сса шартIирдай ЦIуссалакрал милицалтрал буккан бувссия къачагътурал шалклува 20-нния ливчусса Липецкаллал ОМОН-далул аьралитал. Та дяъвилул иширттаву ккаккан дурсса чувшиврухлу Муслимлун дуллуна Къучагъшиврул орден. Ванал аьрали лайкьшивурттая цикссагу чивчунни, Дагъусттаннал бакъасса, федерал СМИлулгу.

Дяъвилул ишру къуртал хьуну махъгу ттул арс лайкьну биттур буллай ия цала къуллугърал буржру. Дагъусттаннал виваллил иширттал министрнал хъиривчунал къуллугърайсса чIумал, террористурайн къаршисса операциялий каялувшиву дуллай, захIматсса щаву дирну уссия.
Ттул чIивима арс Залимхангу та яла дяъви къизгъинмур чIумал Авгъаннаву аьрали бурж лахълай ивкIссар. Лайкь хьуссар Къучагъшиврул ордендалун. Ваналгу хъуннасса гьурттушинна дурссар ЦIуссалакрал райондалийсса дяъвилул иширттаву.

Дагъусттаннал халкьуннал шаэр Фазу Аьлиевал бур «Чув битлай бухьурчагу, ккулла ниттил къюкIливух буккайссар» тIисса махъру. Цими ккулла бувкссарив ттула къюкIливух ттунма бакъа къакIулссар.

Арулва оьрчI ччаннай бацIан бан бигьану бакъая. Ласналгу, нагу хIарачат бувссия жула оьрчIру захIмат ххирану, кьянкьа-кьурчIину, инсаншиву дуну тарбия бан.
ХIакьину паччагълугърал хьхьичI цикссагу лайкьшивур­тту дурсса ттул арснал бакIрачIан кьини дуркIун дур. Ци-ци бунугу бухьттанну бихьлай, суд-диванну буллай бур. На лабизлай бура зуйн, тIайламур бацIан бан жул чIарав бацIияра, кабакьу бара тIий.

Ттун ххуйну кIулли ттула арс. Мунал тачIав къадантIиссар цайва тахсир ккаклакисса, закондалул ххуттава увксса тIул.
ХIакьину ттул оьрмулун 83 шин дур. Уттигу циксса итадаркьуну дуссарив хъунасса Заннал къакIулли. Циксса духьурчагу, ва дунияллия дакIгу рахIат дурккун гьан ччива.