Дагъусттаннайн бувкIунни медициналул 14 комплекс

Республикалул Минздраврал лавсун бур ттигу 14 цIусса, кIанттая кIанттайн ласайсса, медициналул комплексру, гьан-бучIан архсса кIанттурдайсса агьалинал цIуллу-сагъшиву ххал дигьлансса. Мивун бухлай бур 2 амбулатория, 8 куклусса ФАП, 2 кIанттая кIанттайн ласайсса цифрардал флюорограф, 2 маммограф.


Комплексру ххалгу бувну, миннул къулайшиннардая бувсунни ДР-лул цIуллу-сагъшиву дуруччаврил министрнал буржру биттур буллалисса Жамалуттин ХIажиибрагьимовлул. Куклусса медициналул кабинетирттал къулайшиву ссаву дур чирча, ми гьарца аьркинсса оборудованиялул лащу-щаллусса бушивруву дур.

Медициналул зузалтращал­сса ихтилатраву министрнал кIицI лавгунни куклусса медкомплексру ишла буллалаврийну сантирайн рутан бюхъантIишиву архсса шяраваллаву ялапар хъанахъисса агьалинан цила чIумал кумаг баврил даву. Куклусса комплексру машан лавсун бур «Развитие первичной медико-санитарной помощи» тIисса регионал проектрал лагрулий.
Гьашину Дагъусттаннал Минздраврал машан лавсун бур кIанттая кIанттайн ласайсса медициналул 55 комплекс. Миннува 4 — куклусса амбулатория, 12 – флюорограф, 6 – маммограф ва 33 – куклусса ФАП (ца ФАП лавсун бур машлуй махъун щун дан бювхъусса арцух).

ФАП-ру буллуну бур Гумбетуллал, Щаржавуллал, Ахттиял, Къарабудахкантуллал ва Ахъушиял районнал азарханардан, амбулатория буллуну бур Нугъайнал райондалун, флюорографру буллуну бур Казбеков ва ЦIунтIиннал районнал азарханардан. ЧIал къавхьуну ливчIмигу тIайла буккантIий бур районнайн.