Дагъусттаннал Виваллил иширттал министерствалул Наркотикру ишакаш баврил управлениялул зузалтрал кIицI ларгунни пишалул байран. Гьашину 29 шин бартлаглай дур Аьрасатнал МВД-лул системалий Наркотикру ишакаш баврил подразделение тIивтIуну.
Дагъусттаннал виваллил иширттал министрнал бигарду чIумуйну биттур буллалисса Дмитрий Гутырял барча бунни къуллугърал зузалт ва ветерантал.
– Наркотикру ишакаш баврил подразделение Аьрасатнал МВД-лул системалуву ца яла жагьилмур хъанай дур. 29 шинал лажиндарай къуллугърал зузалтран зун багьну бур личIи-личIисса шартIирдай.
Амма гьарицагу чIумал вайннал къуллугърал агьаммур бурж бур наркотикру ва психотропный затру ишакаш дуллалиминнащалсса талатаву, ми лавсун заназисса ххуллурду лакьаву. ЛяличIинува барчаллагь учин ччай ура къуллугърал дахьва гьану бивзсса чIумал зий бивкIсса, жагьилсса зузалтращал опыт кIибачIлай бивкIсса ветерантурахь.
Барчаллагь жагьилминнаву профилактикалул даву дачин дурсса полициялул зузалтрангу, – увкунни Дмитрий Гутырял. Хъирив къуллугърал буржру дакI марцIну бартбигьлагьисса, давриву ххуйсса ккаккияртту чIалачIи дурсса зузалтран дуллунни наградартту.
