Щинал хIакъиравусса батIаврий

Щинал хIакъиравусса батIаврий

Декабрьданул 23-нний ДР-лул БакIчи Сергей Меликов ивунни Каспийск, Избербаш ва МахIачкъала хIачIайсса щинал дузал байсса объектирдайн. Му мукуна ивунни «Талгинка» неххал щин КОР-данувун хIала шайсса ва хIачIайсса щин чапал дуллалисса цаймигу кIанттурдайн.


Микку ашкара хьунни тамансса диялдакъашивуртту. Масалдаран, КОР-данувун хIала духлай дусса дур чIярусса чапалсса щин хъуншагьрулул цIинцIал бакIурду бусса кIанаяту ва КОР-данул чIарахсса цивппа заллусса къатрачIату нанисса чапалсса щин.
Сергей Меликовлул Салман Дадаевлуйн тапшур бунни КОР-данул щинал марцIшиву ядайсса кIанттурдай (водоохранная зона) къатри бувма цу уссарив, мунахьхьун ихтияр щил дуллуссарив кIул буван, микку цIинцI-ччюрк дичайсса кьаллу щил бивхьуссарив хъирив лаян.

Яла Каспийск щинал дузал баврил ва цаймигу масъалартту ххал бивгьунни шагьрулул администрациялий хьусса батIаврий.
ДР-лул БакIчинал бувсунни Каспийск щинал дузал буллалисса кIанайсса тагьардания, кIицI бунни цуксса хъунмасса зарал биллай буссарив чапалсса щинаяту шагьрулул агьалинангу, миккун бизан бувсса Каспийскаллал флотилиялул базалунгу. Сергей Меликовлул республикалул вице-премьер Инсаф Хайруллиннуйн тапшур бунни хьусса тагьарданул хIакъираву Дагъусттаннал БакIчинал цIаниятусса лаизаву хIадур дуван Дагъусттаннал прокуратуралийн.

БатIаврий Дагъусттаннал премьер-министр АьбдулпаттахI Амирхановлул, ДР-лул ХIуку­матрал Председательнал хъиривчу Инсаф Хайруллиннул, МахIачкъалаллал бакIчи Салман Дадаевлул, Каспийскаллал бакIчи Борис Гонцовлул ва цайминналгу цалами пикрирду бувсунни ххал бигьлагьисса масъаларттал хIакъираву.
БатIаврил хIасиллу дуллалисса махъ лахълай, ДР-лул БакIчинал тапшур бунни 2021 шинал щин марцI дуккан дувайсса сооруженияртту, бакьингу бувну, зузи буван, Каспийскаллал, МахIачкъалаллал ва ливчIмигу шагьрурдал хIачIайсса щин цила нормалийн дуцин.

Читайте также: