ХIаснил арс Сулайманов Саэд
Ноябрь зурул 2-нний аьпалухьхьун лавгунни чIярусса шиннардий Ккуллал райондалул бакI дургьуну ивкIсса Сулайманов Саэд ХIаснил арс.
Увну ур Саэд 1956 шинал октябрь зурул 18-нний Хъювхъиял шяраву.
1972 шинал кIикку школагу къуртал бувну, увххун ур Дагъусттаннал 1-мур педучилищалувун. Му къуртал бувну махъ зун ивкIун ур Хъювхъиял школалий учительну. 1982 шинал Саэд увххун ур Дагъусттаннал пединститутрал тарихрал факультетрайн. Мунияр махъ ца шинай районнал школарттал инспекторну зий ивкIун ур. 1988 шиная 1992 шинайн ияннин ва ивкIун ур Ккуллал райондалул исполкомрал сакиншиндарал отделданул каялувчину.
1992 шинал Саэд увчIуну ур Орджоникидзел цIанийсса Хъювхъиял колхозрал председательну. Шикку зий хьуну дур ванал арулла шин. 1999-2005 шиннардий зий ивкIун ур Ккуллал райондалул администрациялул бакIчинал хъиривчуну.
2005 шинал ивтун ур Ккуллал райондалул бакIчину. Вава къуллугърайн увчIуну ур кIийла ялагу. Ванал каялувшиву дуллалиссаксса хIаллай райондалий дурссар ккалли дансса ххуй-ххуйсса давуртту. Хъусращиял шяраву бувну буссар ххаллилсса спортзал, Ккуллал ва Ваччиял шяраваллаву бувссар ттизаманнул школартту. Шяраваллаву бувссар 8 ФАП. Му бакъассагу, ванал каялувчишиву дуллалисса чIумал, бакьин бувссар Ваччавсса, 1-мур ЦIувкIравсса ва Хъювхъавсса Аьрасатнал халкьуннал аслийсса культуралул центрду. Асфальт бавкьуссар райцентрданийх ва ЧIяв бияннинсса ххуллийх. Ваччиял шяраву дацIан дурссар АхIмад-Хан Султаннунсса гьайкал.
Бивхьусса захIматрахлу Саэд лайкь хьуссар паччахIлугърал наградарттан. 2002 шинал ванан дуллуну дур «ДР-лул муниципал къуллугърал лайкь хьусса зузала» тIисса цIа. Гьарцагу даврий ванал чIалачIи бувссар цува лавайсса даражалул пишакар ва жаваблувсса каялувчи ушиву. Ванал цIа бусраврай зумух ласайссар архIал зий бивкIминнал ва райондалул жяматрал.
Оьрмулия щалихханнин къаивтун, жуна цинявннанагу бусравсса инсан аьпалухьхьун лагаврил жижара буллай, дакIнийхтунусса кьурчIишиву кIидачIлай буру кулпатрахь, оьрчIахь ва махъсса цинявппагу гъан-маччанахь. Цал рухI бигьаний дишиннав, алжаннул ххари аннав!
Ккуллал райондалул жямат, дустал, гьалмахтал
