«Магьирлугърал хьхьунил» онлайн-кьаралданийгу цачIун бунни тамашачитал

Ноябрь зурул 3-нний билаятрал цинявппагу регионнай, «Магьирлугърал цачIун буллалиссар» тIисса лозунгралу, хьунни Аьрасатнал халкьуннал цашиврул кьинилун хас бувсса, аьдатравун багьсса, щалвагу Аьрасатнал акция «Ночь искусств».


Билаятрайсса эпидемиологиялул тагьар сававну, ва базилух щалва акция онлайн-кьаралданий хьурчагу, муний гьурттушинна дунни Дагъусттаннал чIявуми маданиятрал идарартталгу. Миннал хIадур дурсса ряхцIалуннийн дирсса онлайн-мероприятияртту ххал дан соцсетирдаву цачIун бавтIунни ацIазаруннийн бивсса тамашачитал.
Дагъусттаннай «Магьирлугърал хьхьу» дайдирхьуна П. ХIамзатовал цIанийсса музейраву Дагъусттаннал пишакарсса магьирлугърал гьану бивзминнан хас дурсса выставка «120 лет. Джемал Муэддин-Араби, Аскар-Сарыджа Хас-Булат» тIитIаврийну.

Маданиятрал ва магьирлугърал ишккаккултрахь проектрал презентация барча тIий, республикалул культуралул министр Зарема Бу­ттаевал увкуна:
— Ва хIаз бизансса художествалул проектрайну тIитIлай буру жува Аьрасатнал халкьуннал цашиврул кьинилун хас дурну гьарца шинал шайсса щалвагу Аьрасатнал «Магьирлугърал хьхьу».

«Магьирлугърал хьхьу» – маданиятрал оьрмулуву хъинну яргсса ишри.
Гьархьхьуну музейрдаву кка­ккиялий дирхьуну дур цIанихсса художниктурал давуртту, библиотекарттаву ккалай бур цIанихсса шаэртурал шеърирду, баллай бур цIанихсса композитортурал музыка, ккалай бур оьрчIансса ва хъуниминнансса лекцияртту, буллай бур мастер-классру.Театрдаву ва концертирттал идарарттаву ккаккан буллай бур театрдал язими спектакллу, оркестрдал ва ансамбллал концертру, буллай бур литературалул ва музыкалул экспозицияртту.

Гьашинусса шинал билаятрал магьирлугърал оьрмулувусса гьарцагу иш хъанай бур онлайн-кьаралданий. Амма мунивугу дуссар цила ххуйшиву! Ва караматсса пространствалий хъанахъимуних бурган хъанай бур гьарцаннаща. «Магьирлугърал хьхьуну» хъана­хъисса гьарцагу иширал тIайланнасса трансляция най ду­ссар YouTube-каналлай ва соцсетирдаву идарарттал официал страницардай.

Цуппа хIасул хьуния шинмай акциялул цачIун буллай буссия ларайсса магьирлугърал кьимат кIулми. Цуксса хIайпнугу, гьашину, кIулсса сававрттайн бувну, жунма багьлай бур ккаккан дурсса ссуссукьушиннардайн ва тIалавшиннардайн мютIи хьун. Амма ми шартIирдавугума жула маданиятрал идарарттал хIарачат бунни, магьирлугърал байран лавайсса даражалий хIасулгу дурну, микку хъанахъисса жура-журасса ишру онлайн-трансляциярттай ккаккан бан.

«Магьирлугърал хьхьуну» оьн­ма бакъая сайки цавагу маданиятрал идара. Хъинну яргсса концертрал программа ккаккан дурунни Къумукьнал театрданул сахIналий Дагъусттаннал балайрдал ва къавтIавурттал ансамбльданул. Микку лакку балай увкунни Дагъусттаннал халкьуннал артист МухIсин Камаловлул.
Лакрал театрданул ккаккан бунни репертуардануву ца яла хьхьичIунсса кIану бугьлагьи­сса, тамашачитурангу ххира хьусса спектакль «Ччаву ва макь». Режи­ссер Дагъусттаннал халкьуннал артист Аслан МахIаммадов.

Спектакльданул тIайланнасса трансляция дуссия Инстаграм сетьрай театрданул официал страницалий, цилгу бавтIун бия сайки 1500-ннийн бивсса тамашачитал.