Къулай хъанай дур «анаварсса кумаг» баврил шартIру

ДР-лул ЦIуллу-сагъшиву дуруччаврил министерствалул пресс-службалий бувсунни республикалул бюджетрава итадаркьусса арцух цIусса 48 машина (Lada Largus) машан лавсун, ми буллуну бушиву республикалул цIуллу-сагъшиву дуруччаврил идарарттан цила чIумал бан аьркинсса кумагран ишла буллан.


ЦIуллу-сагъшиву дуруччав­рил министр Жамалуттин ХIа­жиибрагьимовлул, ми машинартту анаварсса кумаг бан аьркинмунил цуксса дузалну буссарив ххалгу бувну, барчаллагь увкунни коронавирусрал инфекциялущал талай бивкIсса хIакинтурахь.

Гьашину республикалул лавсун бур 73 машина къашайшалтран анаварсса кумаг бан бюхъай­сса. «ЦIусса автомобиллу машан ласаврийну жущава бюхъантIиссар архну къалавгун къашайшалтран анаварсса кумаг буллан. ЦIанакул, медициналий хъуннасса гьиву ду­сса тагьардануву, цуяца къашайшала къааьркинссар къулагъасрала ­уккан. Мунияту машинартту вассят наниссар линиярттайн», – ххи бунни министрнал.

«ХIакьину жулла республикалий хIасул дуллай бур анаварсса кумагран аьркинсса шартIру. ЦIусса автомобиллу машан ласаврийну ххи хьунтIиссар анаварсса кумаграл къуллугърал даврил лябуккугу. «Анаварсса кумаг» занан аьркинссар анаварсса кумаг аьркин­сса кIанттайн. ЦIусса машинартту тIурча, занантIиссар махъун бутан къабучIисса кумаг бан аьркинсса кIанттурдайн», – увкунни Жамалуттин ХIажиибрагьимовлул.

Lada Largus автомобиллу бур универсалсса, уттубивхьусса къашайшалтран къулайшиннардал лащу-щаллусса. Укунсса автомобиллу бучIантIий бусса бур рес­публикалул цинявппагу идарар­ттайн ва цаппарасса районнал ва шагьрурдал медициналул идарарттайн.
Шиккува дакIнийн бутан, гьашину анаварсса ва цила чIумал аьркинсса кумаграл парк жулла республикалий чIаланну цIу був­ккун бур. Республикалийн бувкIун бур 130 А, В, С классрал реанимобиллу.

Му бакъассагу, ттигъанну «Здравоохранение» национал проектрал лагрулий республикалул районнал больницардайн бувкIун бур ххюва мобильный фельдшерско-акушерский пункт (ФАП). Миннуй хIакинтал транспорт къалагайсса, 100 инсаннаяр чанну ялапар хъанахъисса щархъавун занай, агьали кIанттурдайва ххал буллантIий бур.
ЦIусса «Газель Next» мобильный ФАП-ру тIайла бувккун бур Аьхьхьахъиял, Бущихъиял, Гъуниннал, Дахадаевуллал ва Къайтагъуллал районнайн.

Жамалуттин ХIажи­ибра­гьимовлул бусласимунийн бувну, республикалийн бувкIун бур 15 ФАП, чIал къавхьуну бучIантIий бур 17 ттигу.
Шинал ахирданийннин республикалийн бучIан тIий бур лащу-щаллусса машинарттайсса 55 медициналул кабинет, миннува 4 бур амбулатория, 32 – ФАП, 12 – флюорограф ва 6 маммограф.