Электроэнергиялул дузалшин ва къадузалшин

Ноябрьданул 18-нний МахIачкъалалив хьунни республикалий агьали электроэнергиялул дузал баврил хIакъиравусса пресс-конференция. ДР-лул ХIукуматрал Председательнал хъиривчу – ДР-лул энергетикалул министр Владимир Лемешкол ва «Россети Северный Кавказ» ПАО-рал гендиректор Виталий Ивановлул журналистътурахь бувсунни токрал ххаллаву аварияртту шаврил сававрттал ва ми букьан бувансса чараннал хIакъираву.


Владимир Лемешкол тIи­мунийну, ЛЕП-рдай аварияртту шаврил сававртту, тIабиаьт оьдикIаву дакъасса, цаймигу дусса дур. Миннува­сса ца хъанай дур закондалий бакъа чIярузивурдайсса къатри буллалаву.

Мукунсса къатри республикалий бувну бур 410. Ми къатри закондалий бакъа бавзуну бур токрал сетирдацIун. Миннул сетирдайнсса гьиву кIу дурну, ми ччяни лиян дайсса дур. Муналва бувсунни чани лещан баврил цамургу сававрая – инфраструктуралийн ххишаласса гуж багьаву.

МахIачкъалалив гъараллал щин дукьайсса (ливневая) канализация цIанасса ппурттуву шагьрулий ялапар хъанахъисса агьалинан хIисав дурну дакъар.

Му канализация дурну диркIун дур шагьрулий 300 азара инсан ялапар хъанай ивкIсса чIумал. ХIакьину халкь шамлий гьарза хьуну бур. Канализациялувату нанисса щинал дуцIин дуллай дусса дур токрал ххаллу дусса каналлу.

Му чIумал дух хьусса ххаллай замыкание хъанай дур.

Виталий Ивановлул бувсунни, вай гьантрай Дагъусттаннайн Пятигорскалия энергетиктурал бригадартту бувкIун, токрал станцияртту ва ххаллу дакьин дуллай бушиву.