ЦIусса хаварду ца-кIива ххуттайну

Татар мазрал 100 учительнан грантру дулунтIий бур

Татарсттан Республикалий 100 инсаннан дулунтIий бур гьарцаннан ххюцIа-ххюцIалазарда къуруш. ХьхьичIунсса преподавательтал личIи бувантIий бур дарсру дишаврил кьяйдарду, бюхъу-тяхъа, мукунма миннал учениктурал конкурсир­ттайсса ва олимпиадарттайсса гьурттушинна хIисавравун ларсун. Декабрь зуруй хьхьичIунсса учительтал личIи бувну, грант хIисаврай, бахшишран ххюцIа-ххюцIалазарда къуруш арцул гьарцаннан дулунтIий бур. Ши­ккува бусанна Татарсттаннал министртал хасъсса курсирдай ни­ттил маз лахьлай бушивугу. Ми курсру тайннал КIулшиву дулаврил министерствалул хIасул був­сса бушивугу.

БачIи миллион –
миллатрал лаххия ккаккан дуванну

Ссибирнавусса бикIлил агьулданул хьхьичIазаманнайсса лаххиялул коллекция буван «Дружба Северян» тIисса жагьилтурал ккурандалун 500 азарда къуруш личIи дурну дур «Культура» национал проектрал лагрулий.
– Жул миллатрал лаххия авур­сса, ххуйсса дур, амма шагьрулул кIанттай лаххан къулай­сса дакъар. Миллатрал лаххиялуву шагьрурдай занангу къулайну бакъар. Мунияту жун пикри хьунни жула миллатрал лаххиялул накьичру, элементру ду­сса этноколлекция хIасул буван. Жула гьухърай, юбкардай миллатрал лаххиялул лишанну дирхьуну, ххаришивурттай, форумирттай ва цаймигу байраннай лаххаван. Ва ялагу, укун­сса этноколлекция хIасул баврийну жу лавгзаманнущалсса дахIаву хIура дуккан къаритлатиссару. Лаххиялуву лавгзаманнул ва ттизаманнул накьичру хIала-ккала даркьуну, цIакь дуллалиссару дахIаврил ламул ттарцIру, – тIий бур Жагьилтурал ккурандалул хъунмур Карина Етаургина.

Якутнал мазру ябуван 56 миллион

Ялун нанисса 2021 шинал Якутнал мазру ябаву мурадрайсса паччахIлугърал программалун 56 миллион личIи бувантIий бусса бур. Укунсса хIукму бувну бур Саха Республикалул хIукуматрал хъунама Андрей Тарасенкол. Мукунма якут агьулданул паччахIлугърал мазурдийсса лу­ттирду итабакьинсса ва мива мазурдийсса мультикру дувансса давурттаха зунтIий бусса бур. Миллатирттал мазру ябавриву миллатрал прессалул биялагу хъунмасса бухьувкун, пре­ссалул чIарав бацIансса программагу дур.
«Национальный акцент» порталданийн чул бивщуну, хIадур бувссар

ПатIимат
Рамазановал