Вай гьантрай хьунни лакрал халкьуннал хьхьичIазаманнул балайлул «Щаза из Куркли» тIисса фестиваль.
Бадрижамал Аьлиева
Му сакин дурну дия ДР-лул Культуралул министерствалул, Республикалул Халкьуннал творчествалул къатлул, Лакрал райондалул администрациялул ва Культуралул, жагьилтурал политикалул, спортрал, туризмалул центрданул ва ЦБС-лул.
Махъ ппурттувусса сайки циняв шадлугъру кунна, ва фестивальгу хьунни онлайн-режимрай.
Фестивальданий гьуртту хьунни Ахъушиял, Лаващиял, Ккуллал, Лакрал ва ЦIуссалакрал районнаясса творчествалул коллективру ва таксса балайчитал.
Ккурккуллал Щазал цIа кусса фестиваль ванил ватандалий – Лакрал райондалий дуллай аьдатравун дагьну дур. Щаза дунияллия лавгун циксса шинну гьарчагу, ванил мукъурттийсса балайрду ттигу-шилагу машгьурну бур. Щазал балайрду, ттизаманнул балайчитурал щаллу буллай, лехлайнма бур ттигу Дагъусттаннал зунттавух.
