БамацIару, щурущира

БамацIару, щурущира

Вай гьантрай Дагъусттаннал паччахIлугърал университетраву хьунни «Точка кипения» тIисса проект щурущи даврин хас дурсса агьамшиву хъуннасса батIаву.


З. АьбдурахIманова
Ваний гьуртту хьунни ДР-лул кIулшивуртту дулаврил ва элмулул министр Уммупазил Оьмарова, информатизациялул, связьрал ва коммуникациярттал министр Сергей Снегирев, промышленностьрал ва машлул министр Батир Эмеев ва жагьилтурал иширттал министр Камил Сяидов, мукунма университетрал пишакартал ва студентъталгу.
БатIаву тIитIлай, ДГУ-лул ректор Муртазяли Рабадановлул кIицI бунни университетрал укунсса даражалул проект щурущи дан хIадур хъанай хъунма­сса хIал хьушиву ва щурущи дан лайкь хьусса вузирдавух ДГУ 93-мур кIанай бушиву.

— Вайми регионнайсса вузирдаву зузи дурми «Точка кипения» жучIарамуниха къалархьхьусса дуссар. Цанчирча, жучIара ишла данмур проект ххал дигьайни хIисавравун ларсун тIий жула чIяву миллатру бушиву ва географиялуцIун дархIусса лишаннугу,- увкунни ректорнал.

ПроектрацIун дархIусса мероприятияртту вания гихуннай нантIиссар «Сари-Къум», «Каньон», «Порт-Петровск» ва «Каспий» тIисса идарарттал майданнай.
Цифрардал ва технологиярттал лябуккулул жаваблувшиву тапшур дурсса Аьрасатнал ПрезидентначIасса хасъсса вакил Дмитрий Песков, ДГУ-лун тIайлабацIу чIа тIий, кIицI буллай ур цува хъинну рязину ушиву жулла республикалий ва проект зузи дан Дагъусттаннал паччахIлугърал университет язи бувгьуну тIий.

-Проект цурда хъанахъиссар цумур-цагу регион хьхьичIуннай хъит учин давриха зунтIисса институтну. Муниха зун аьркинссар регионнал каялувчиталгу, укунмасса агьали ва жагьил­сса ишбажаранчиталгу. Миннал сакин дурсса ккураннаву ляхъан аьркинссар регионнай зузи дуллантIисса ва ишла дуллантIисса цIу-цIусса проектругу, программардугу,- кунни Песковлул.
БатIаврий гьуртту хьусса Санкт-Петербургуллал политех университетрал проректор Алексей Боровковлул кIицI бунни цала шихун учIаннин Да­гъусттаннал экономикалул махъсса шиннардийсса тагьар ххал диргьушиву. Ванал бусаврийну, цалчинмур кварталданул хIасиллах бурувгун, шиная шинайн промышленностьрал индекс лахъ хъанахъавриву жулла республика лархъун дур экономикалул тагьар къулай хъана­хъисса Аьрасатнал 5 регион дусса сияхIрайн.

Республикалул промышленностьраву биялсса бутIа бу­сса организациярттавух ванал кIицI бунни хъунмасса потенциал бусса «КЭМЗ», «ХIажиевлул цIанийсса» завод ва «Дагдизель».
ДГУ-луву тIивтIусса «Точка кипения» тIисса ва майдан жулла республикалий хьун аьркин­ссар хIукуматралгу, муниципалитетиртталгу, бизнесралгу вакилтал ва кIулшивуртту дулаврил, элмулул, граждан обществалул арардаву зузимигу, федерал экспертъталгу лагма лаган бан­сса цасса центрну.

Читайте также: