Рамазаннул арс Ибрагьимов Аьбдурашид

Оьрмулул 69 шинаву аьпалухьхьун лавгунни ЧIяйннал шяраватусса Рамазаннул арс Аьбдурашид (борец). Буттал шяраву 8 классгу къуртал бувну, Аьбдурашид буттащал лавгун ур Дянивмур Азиянавун, Байрам-Али тIисса шагьрулийн. Тиччава армиялийн увцуну, шанна шин дурну дур къуллугъ буллай. Армия лавхъун махъ хъунама уссу Закирдущал яхъанай ивкIун ур Къабардин-Балкьарнаву, Терек шагьрулий. Тикку зий ивкIун ур «Бытовое обслуживаниелул» комбинатрал личIи-личIисса давурттай. ХIалал дурну дур хIурматрал грамотарттугу, бахшишругу.

Дагъусттаннайн зана хьуну махъ Аьбдурашид, кулпатгу бувну, яхъанай ивкIссар Хушетрай, зий ивкIссар кIанттул советрал даврий. Цала оьрмулул дус Аьишатлущал ванал лайкьну хъуни бувссар кIия арс ва кIива душ.
Аьбдурашид ия дакI хъин­сса, дусшиву дан хьхьичIунсса, инсаннан цащава шайсса кумаг бан ччисса чув-адамина.

Хъунмасса хIурмат бия Аьбдурашидлул ЧIяйннал жяматрал дянивгу. Ванан кIула инсаннал дакIниймур ласун, чIарав ацIан. Ци бан шайссар, ажалуннин мажал къабикIайссар учай.
ДакIнийхтунусса кьурчIи­шиву кIидачIлай буру ванал кулпат Аьишатлухь, арсурваврахь, душваврахь, куявтурахь ва махъсса мачча-гъаннахь.
Аьпа баннав цал, махъ ливчI­миннал оьрмурдай барачат бишиннав.

ЧIяйннал жямат

---

Султаннул душ МахIаммадова Бахъи

Оьрмулул 83 шинаву аьпалухьхьун лавгунни Ккуллал шяравасса ххаллилсса хъамитайпа МахIаммадова (Кьаландарова) Бахъи Султаннул душ
Бувну бур Бахъи 1937-ку шинал Ккуллал шяраву Султаннул ва Къитал кулпатраву. Анжагъ мукьра шин диркIун дур ванин ппу дяъвилийн лавгсса чIумал. Дяъвилияту га зана хьуну акъар. ЧIярусса захIматшивуртту духIан багьну бур Къитангу, чIивисса Бахъингу. Ххишалдаран, яла оьрмулул аргъ дирзсса чIумал Бахъи мушакъатгу хьуну бур.
Бахъи бия цилла дакI цилла дайсса, инсаншиву дусса, аьчух­сса, цуппагу гъан-маччанай дакI-лякьа цIисса инсан. Ва ххирасса бия гъан-маччанан, чIахху-чIарахнан, бусравну бия шяраваллил жяматран. Буттал шяравату лавгун мукьах МахIачкъала шагьрулий ялапар хъанай ванил хьуну дия зувинниха лирчусса шинну. Аммаки Бахъил пикри-зикри бия кIайва цила буттал шяраваллия, Ккуллал жяматрая, Лакку кIанттуя.
Гьарца цила ххаришивур­тту ва дардру ванил пасихIну бусайссия цила назмурдайнугу.
Хъуннасса пашманшиву хьунни ва ххираминнал дакIур­диву. Бахъиятусса аьпа абадлий личIантIиссар гъан-маччанал ва жяматрал дянив.
Бахъи аьпалул шаврил кьур­чIишивугу кIидачIлай, жижара буллай буру цинявппагу ванил гъан-маччанахь. Ванил барачат махъ ливчIун лякъиннав, алжаннул ххари баннав, рухI хъинний дишиннав, гьав нурданул дуцIиннав.

Ккуллал шяраваллил жямат, гъан-маччами

Дардирдал шану банна

Бахъил цилла назму

Ва дуниял най дури,
Чани хъанай, цIан хъанай.
Ттул оьрмугу най бури,
Кувни аьтIий, кувни хъяй.

Дардирдал шану банна,
Щугълурдал виргъан данна.
Буруккинттал дурцIусса
БакI кIараллий дишинна.

Бабал бувсса ссу хьурдай,
ДурцIу дакI дачIра дуван
Ва къумасса дакIнищал
Гьаттавун къагьанссара…

На бивкIусса баярчан,
ЦIими бусса ухьурчан,
Вай ххаругу бувккуну,
Ттуя аьпа учара.

---

Хъуннасса кьурчIишивугу кIидачIлай, дакIнийхтуну жижара буллай буру ГьунчIукьатIрал школалул директор Къушиев Маликлухь, уссурвал Шамиллухь, Шагьабуттиннухь, ссурвал Насиятлухь, БатIахь, Саидахь, Залинахь, вайннал аьзиз­сса нину
Роза
аьпалул шаврийн бувну.
Махъминнал оьрмурдай барачат бишиннав. Имандалий лавгсса хьуннав. РухI чаннаний, чурх бигьаний бишиннав. Пирдавс алжан булуннав. Амин.
Касаевхъал кулпат,
ш. БахIикIул

---

ГьунчIукьатIрал школа­лучIасса «Дараччи» клубрал члентал, учительтурал коллектив, школалул зузалт, хъуннасса кьурчIишивугу кIидачIлай, дакIнийхтунусса жижара буллай буру жулва коллега­хъахь Малик МахIаммадовичлухь ва Насият МахIаммадовнахь, уссур-ссуннахь, щалва авладрахь, вайннал аьзизсса нину Роза жуятува личIи шаврийн бувну.
Ва бия мяйжаннугусса зун­ттал хъамитайпа, бусайсса мукъуй цIу бусса, дайсса даву усттар­сса, карчI дакъасса. РухI алжаннул ххари даннав!
ГьунчIукьатIрал щарнил
«Дараччи» клуб

---

Аьзизсса
душнил аьпалун

Буттал чагъар бувкIуна:
«Вин душ бувну бур, — тIисса.
— Ява, пашман машара,
Арсгу анссарча», — тIисса.

Нарив пашман къавхьура,
Ялунгу ххари хьура,
ТалихI ссаву буссарив
Так Заннанни кIулсса тIий.

ЧIивинийва вияту
Ниттин урчIа ка хьуна.
Буттангу оьрмулуву
Ца ххазинану бияв.

Ина жул чаниявхха,
Цан левшра муксса ччяни.
ТачIав къадишин ххива
Вил симан бявкъу чарий.

Вил гьаттай дирхьу тIутIив
Меж диркIунни, кьаркьунни.
Вил оьрмулул шиннугу
«Химиялул» дуркунни.

Арснал оьрчIру-кIинничалт
ВичIан буцара тIий бур.
Амма жуща къабюхъай
Ина бу кIану бусан.

Ина жучIату найни
ЛарчIуна гужсса гъарал,
Циванъявав мукссара
Аьрщи вих мякьну диркIсса.

Ми духьунссия, ххирай,
Вих аьтIинал кьурчIи макь,
Аллагьнал гъарал дурну,
Вил хъирив дутIлатIисса.

Жу хIатталлив бучIару,
Кьулгьу-алхIам буккару,
Аллагьнахь миннат буллай,
Вил рухыI хъинний диша тIий.

Агь, Назират, ххира душ,
Цукун хъамабитава,
ДакI вих хьун хъанай дакъар
Тти ина бакъашиврийн.
Сагидаьли ва Асият
Сагидовхъул,
ш. Шахьуйми