Жулла цIуллушиву жулла кIунттихьри дусса

ЦIанасса чIумал щалла дуниял дургьуну дур коронавирусрал: цила лагмасса хъицIал кумаграйну инсантурал клеткардавунгу дурххун, цIусса вирусру хьун буллали­сса фабрикалийн кIура дарну дур. Вирусру гьарза хъана­хъиссаксса инсаннай пневмония хъанай дур, хъунив хьумигу, цайми цIуцIавурттал азурда бувмигу чIявуну ххассал хъанай бакъар. Инсантуравунгу ццах багьлай бур, ссайн, щин вих хьунтIиссарив къакIулну личIлай бур.
ДакIний битияра, вирус мукссара ццах бутансса дакъассар. НигьачIаву ва вирус жунна къакIулшивриясса дур, ВОЗ-рал бусласимунийн бувну, гриппрал гьарца шинах литIлатIиминнал аьдадгу ванияр чIирисса дакъар. Ццахгу кьабивтун, вания буруччинсса ххуллурду хъамакъабитанну:

1) Маскарду лахлахияра. Маскалул, чIирисса чIумуй бунугу, жува буручлачиссару вирусраща, амма маска цурда атил шайхту, иттисса капиллярдайхчин махъуннай жувунна бю­хъайссар духхан вирус. Мунияту маска даххана дуллан аьркинссар гьарцагу 1,5 ссятрай.

2) Ччя-ччяни кару шюшлашияра.

3) МабацIларду инсантал чIявуний, къахъанай бухьурча бацIияра кувнная кув бюхъай­ссаксса архну, чара бакъа гьан аьркинсса кIану бакъахьурча, бацIияра шаппа.

4) Эпидемиялул чIумал кару дугьлагьаву, хъямала багьавуртту кьаритияра.

5) КьатIату шаппай буххайхту, вилаглагияра кьацI, май физиологиялул растворданий (цIил щинай: ца стакан гъилисса щинавун 2 гр. цIил дирчуну, ххуйну хIалагу дурну).

6) Ишла дувара катIри (транспортрай, ттучаннай, больницардай, аптекарттай).

7) Мугъаятшиву ххи дара чIяву инсантурал кару щилащисса кIанттурдай, масала, лифтрай. Чара бакъа кару шюшияра лифтрал, банкоматрал хъиривгу.

8)Бюхъайссаксса лажиндарайн кару мащиларду, яруннийн хъиннува, бацIан хъанай бакъахьурча, бартка щияра.

9) Ишла дувара антисептикру:
-надуксусная кислота;
-гипохлорит натрия (0,05%);
-этанол (70%);
-хлоргексидин биглюконат (1%);

10) Зура ишла дайсса тIахIни-кIичIу (къусри, гьиссилтту) щилчIав хьхьичI мадихьларду, дирхьуну махъ хлор хIаласса раст­ворданий шюшияра.

11) Инсантал чансса кIан­ттурдай, марцIсса гьавалий (шагьрулул кьатIув, паркирдаву ) заназин дуллалияра.

Вай гьарзатгу жущара дан шайсса затру дур, так карчI къадурну, ишла дулларча, цIуллуну личIантIиссару.
ЦIуллуну битаннав!

ХIадур бувссар Т. ХIажиевал