Бакуйсса лакрал агьулданул тарихрава

Бакуйсса лакрая жува ттинингу чанну-ххину чивчуссия. Цумур бухьурчагу миллатрал диаспоралух къулагъас дан багьлай бикIайхьунссар. Буттал Ватандалиятугу ябувцун, чил кIанттай яхъа­нансса кьадар нясив бувсса миннан, ччайнугу-къаччайнугу, цайми агьалинал дянив интеграциялул хъанан багьай. Амма цивппа чассарив, цала тарихийсса мина-гьану, буттал буттахъал билаят хъамакъабитанмур буллан бикIай. Цивппа яхъанан ва зун бувкIсса кIанттай ккуранну сакин дуллай, цачIун хъанан бикIай. Гьай-гьай, къачансса инсантал, цайми миллатирттавух хIала хьуну, бявххунгу лагай.

---

Бакуйннал шагьрулийсса жула лакрал диаспора, цайми-цайми кIанттурдах бурувгун, духьунссар ца яла хъуннамур. Бакуй лак миналул хьуну бур хъинну ччянива. Аьщуйн щуну чIун ккаккан дан захIматри. Масала, ттул ттатта маэшатрал хъирив увкIун ур Бакуйн 1909-ку шинал. Амма, ши­кку хъунма хIал къабувну, лавгун ур Бухарнавун. Ттун кIулли мунащал бувкIун бивкIшиву ялагу цаппара лак.

Муния мукьахсса чIумуйгу лакрал миграция хьхьара хьуну д­акъар: бацIаву дакъа лаглай бивкIун бур, кув – ччатI лякъин, кувгу – репрессиярттаща ххассал хьуншиврул. Бакуйн бувкIминнаяту яла гьарзами бивкIун бур гъумучи ва хьурукIул.

ХIакьинусса кьинигу Бакуй чансса бакъар жула лак. Ми цивппагу хIисав хъанай бухьунссар шамилчинмур, мукьулчинмур никирал агьлулун. Къужри лавгунни аьпа­лухьхьун, ххинугу чIявусса хьуну бур ассимиляциялул. Мадарасса кIура бавнугу бур цалла тарихийсса аьрщарайн – Дагъусттаннайн.
Бакуйннал шагьрулий биялну машгьурссар лакрал кулпатру, тухумру. Масала, Къажлаевхъул. Ва фамилиялул лахъа-хъуншиврул бакIрайва-бакIрай хьуссар цIаних­сса хIакин МахIаммад Къажлаев, хъирив – мунал арс Таймур Къажлаев. Композитор Мурад Къажлаевлул цIа тIурча, анжагъ зумух ласурча гьану бур.

Мукунна машгьурссар шикку Закуевхъал цIагу: чичу, аьлимчу (профессор) Курди Закуев ва мунал арс Фаик Закуев – Азирбижаннай ца яла гьунар бума журналистнан хIисавну ивкIсса.
ЧIявуссаннан кIулссар, стоматологиялул хьхьичIунсса пишакартал хIисаврай, Ягизаровхъал агьлугу, миннацIун – Халкьуннал артист ХIажи-Мурад Ягизаровгу.
Дунияллийх цIа дурксса инсан, летчик-космонавт Муса Маннаровгу Бакуйри увсса.

На яхъанай бура Гьуйннал шяраватусса МахIаммад Аьлиевлул кулпатрал чIаххуврай. Цува МахIаммад ччянива лавгунни аьпа­лухьхьун. Бакуйсса лакрал мунайн Аьлилупхъал МахIаммад учайссия. ЧIярусса шиннардий му зий икIайссия оьрчIан ссуннат баврил давриха. Мунийн бувну мунал цIа къабавсса, къакIулсса хъинну чансса буссар Бакуйсса арамтурал дянив.
Жу хьхьичIва яхъанай буссияв Басиннул цIанийсса кучалий. Му бия сайки щалва жугьутIиял махIла, микку яхъанахъисса чIявумигу бия канил сянатрал усттартал. Миккува бикIайва лакрал къалайчитурал дуссукъаттагу, мува кучалий яхъа­нахъиссагу бия лакрал цаппара кулпатру. Утти та куча ба­къар: тарихийсса агьамшиву дусса ца-кIира здания личIаннин, циняв бух­сса къатригу лекьан бувну, ти­кку бувну буссар ХIайдар Аьлиевлул цIанийсса парк. ЖугьутIгу сайки циняв лавгун бур Израильнавун.
Най дур чIун. ЧIумущал архIал баххана хъанай бур инсанталгу, миннавух – жула лакгу. Агь, ца ччай бакъарча лак лакну къаливчIун, этнос зумувнусса миллатрал бутIуя батIул хьуну, рахIму бакъасса глобализациялул мугьалттувух бяв­ххун лавгун.

Гьай-гьай, гьарцагу кулпатрал бур цила тарих, ирсирай нанисса никирттал кьадар, кьисмат. Цуппа-цуппалу лавсун, миннуя гьарцаннуя хьунссия чичин чIиви-хъунсса жуж.
Уттигъанну на кIул хьура Бакуйннал шагьрулий цIа машгьурсса эндокринолог РайхIанат Къичиеващал. Хъуншагьрулул 4-мур азарханалий эндокринологиялул отделениялул каялувчину зий РайхIанатлул хьуну дур кьура шин. Миччава бувккун бур пенсиялийнгу. Амма, шаппа щякъабикIаншиврул, ва цIанагу зий бур «MedPlanet» тIисса медициналул центрданий.
РайхIанатлул буттал цIа Ла­кку билаятрайгу, Дагъусттаннайгу чIявуссаннан кIулсса цIар – Гъазалил арс Оьмахан Къячаев. МукьцIалла шинал лахъишиврий му зий ивкIссар Лакрал райондалул азарханалул хъунама хIакинну. Му Дагъусттаннал ва РСФСР-данул лайкь хьусса хIакинни.
РайхIанатлущал гъанну кIул хьуну мукьах, гьай-гьай, ттун ччан бивкIуна кIул бан миннал кулпатрал тарих-таварихгу. Цал циванни-ссанни тIийгу бивкIун, РайхIанат ахиргу рязи хьуна бусан, цуппагу хъунмурчIин, цияватунияр, бу­ттаяту.

Ванил ппу Оьмахан увну ур Гъумук. Гъумуква бувну бур цуппа РайхIанатгу. Ванил бу­ттал буттал къушлий бивкIун бур мукьва оьрчI-бакI, шанма ссу – Залму, Бадиржамал, Бахттум ва ца акъа-акъасса арс Оьмахан, цувагу чIина-чIивима.
Оьмаханнун урчIра шин хьусса чIумал буттал му чагуртну ивтун ивкIун ур мусил усттарну зузисса цала ссурахъичIа. Мунийн бувну Оьмаханнун чIивину унува лар­хьхьуну диркIун дур заргалнал сянатгу. Амма чIал къавхьуну , му пишагу кьабивтун, агьну ур дуккаврихун. Дуклай ивкIун ур Гъумук.
Ппу маэшатрай чIявуну лагай­сса ивкIун ур ЗакIатIаллайн, Ттуп­лислийн зунттавух хьуну . Ларсун учIайсса ивкIун ур дахху-ласулул хъус. Ца ххуллух тIурча, ша ливчуну, лахъсса хъархъаллайх ялавай агьну, ххассал къавхьуну ур. Мукун ччяни оьрчIругу буттацIа хьуну бивкIун бур. Оьмаханнунгу, туну, ниттицIунсса кумагчи хьун багьну бур. Амма ва цува дуккавриву итххявхсса ивкIун ур. Лавгун Краснодардайн, бувккуну бур тикку медициналул институт. Муния махъ къуртал бувну бур коммунист партиялул лахъсса школагу. Му школалий мунахь дарс дирхьуну диркIссар тIар цува Сталиннулгума.

Му школа бувккуну мукьах Оьма­хан зана хьуну ур буттал улк­луйн Гъумукун. Ивтунгу ур Лакрал райкомпартиялул кIилчинма секретарьну. Жунма кIулли та бивкIшиву аьрзардал замана. Мукун оьсса кьасттирай чивчусса цумурдив ца аьрза сававну Оьмаханнун кьаритан багьуну бур партиялул даву. Дуллалимуниватугу дакI дурккун, лавгун ур ялагу тава Краснодардал крайрайн – Кубаннавун. Ссахун машхул хьуну ивкIссарив балжийну къакIулли, цаппара хIал тийхгу бувну, зана хьуну ур цIунилгу Гъумукун – ва ххуллух тIурча, ххишала тачIав Буттал кIану кьакъабитансса куццуй.

Му чIумуя тийнай Оьмахан зун ивкIун ур азарханалул хъунама хIакинну (та чIумал кIанийн учай­сса бивкIун бур «Лакское лечебное объединение») куну. Му ппурттуву азархана цуппагу кIанттул хьуну бивкIссар хьхьичIра оьруснал аьра­ли гарнизон диркIсса кIанттай, яни Къалалив. Оьмахан каялувчишиву дуллалиссаксса хIаллай лак­рал азархана бивкIун бур республикалий ца яла эбратранмурну.

РайхIанат дакIнийн бутлай бур: «Агьалинал дянив буттал дия хъуннасса авторитет. Цавагу мажлис, цавагу хъатIи, цавагу кьюртIи ппу къагьурттусса къашайва. Тия-шия бувкIсса хъуни-хъунисса хъамалгу чара бакъа буттачIа ликкайва. Мунал щалла чIун, оьрму даврин харж буллалисса бия. Жул щалва кулпат ва азарханалуцIух яхъа­най бикIайва. Оьрмулул угьара­сса чIумуйн ияннин буттал ба­къая вари чинсса цува заллусса я къа­тта, я участок. Ахиргу ниттил, ялув лирккун, му буллали увна жува бацIансса, ливчIмур оьрму бутансса къатта. Мукунсса къа­ттанугу хьуна цIунил ччаннай бацIан бувсса хъунна-бавал бух­сса къатта-къуш.
Ттул ппу ташулул хьуну ия оьр­мулул 42 шинаву. Уммукусум (ттул нину) мунал бувцуну увкIун ия ЗакIатIаллая. Миннал оьрчIрунугу хьуну бияв жу кIия – ттул уссу Гъазалигу, нагу. Азарханалий медсестрану зузисса оьрус миллатрая­сса хъамитайпалул чIявуну учайва: «Ума и Хан, вас бог создал друг для друга»,- куну. Ми кIивагу махъ цачIу бивхьукун, сакин хъанай дур цурда буттал цIагу – Умахан».

РайхIанат мединститутраву дуклакисса чIумал, ваних эшкьи хьуну ивкIун ур Къичибек Къичиев. Мунан щаргу хьуну бур. Щар хьу­сса ппурттуву ва ккалай бивкIун бур 2-мур курсирай. Мунащал талихI-тирххандарай бувтун бур оьрмугу.
Ласгу аьпалухьхьун лавгун, оьрчIругу цала-цала къатта-къуш­лил хьуну, РайхIанат цIанакул яхъанай бур цуппалу. Амма чIун-чIумуй бияй оьрчIачIан, оьрчIругу бучIай ваничIан.
Битаннав цув оьрмулул буччиннин, оьрчIая ва оьрчIал оьрчIая щалихханнин.

СалихIат Аьлиева,
ш.Баку