1945 шинал сентябрь зурул 2-нний Япония бух шаврил (ярагъ щяв бишаврил) актрай къулбасру дурссар Совет Союзрал, США-нал, Китайнал, Великобританиянал, Франциянал ва цаймигу паччахIлугъирттал.
Ва иширайну КIилчинмур дунияллул дяъвилун ахир дирхьуссар Японнал капитуляциялул хIакъиравусса акт чирчуну диркIсса «Минури» тIисса Американал минкорданий.

***
1812 шинал сентябрь зурул 8-нний Михаил Кутузовлул каялувшиндаралусса оьруснал аьрал Бородино шяравалличIа къучагъну талай бивкIссар французнал аьралуннащал. Ласу бухIан бан­сса зарал биян бувссар Наполеоннул аьралуннайн. М. Кутузовлул хIисаврай, Москав кьабитан багьарчагу, БородинолучIа хьу­сса къизгъинсса талатаврил оьруснал аьралитурал дакI дацIан дур­ссар, француз тIурча, дакI гъаргъун бивкIссар.
Ва талатаву XIX-мур ттуршукулул дяъвирдаву ца яла оь экьибувтIумур талатаврин ккаллиссар. Гьарца ссятрал мутталий 8500 инсан, гьарца минутIрай – щаллусса ротIа саллатIнал литIлай бивкIссар БородинолучIасса талатавриву.
***
1790-ку шинал сентябрь зурул 11-нний Федор Ушаковлул каялувшиндаралусса оьрус­нал эскадра Тендр тIисса минхъличIа ххув хьу­ссар туркналмунияр. Ва талатавриву туркнал аьрал 2000 аьраличунацIа хьуссар, 7 жамилийсса аьралитал, ярагъ щяв бивхьуну, канийн бувкIссар. Сагъну ливчIсса жамирду ливхъссар ЛухIи хьхьирил ух­ссавнил чулуха.
Оьруснал аьралуннаву 21 ивкIусса, 25 ивщусса хьуссар.
Тендр минхъличIасса ххувшаврийну оьруснал флот ЛухIи хьхьирий цIакь хьуссар. Д. Ушаковлуйнгу «хьхьирил Суворов» тIун бивкIссар.
***
1380-ку шинал сентябрь зурул 21-нний Куликово майданнив хьусса талатавриву Дмитрий Донской бакIчисса оьруснал аьра­уннал ххит бувссар монгъул-татарнал ­аьрал. Ва талатаврил лахIан був­ссар Мусил Ордалул цIакь ва анавар ду­ккан дурссар Ордалул лияву.
Му ххувшаву ларсун махъ Аьра­сат цасса хIукумат хIи­саврай цIакь хьуссар.
***
1799 шинал сентябрь зурул 24-нний А. Суворовлул ­аьрал Ухссавнил Италиянава Альпы зунттурдайхчIин Швейцариянавун бувкIссар кIилчинсса французнал каолициялийн къарши­сса дяъви нанисса ппурттуву. КIинттул чIумал Альпы зунттурдайх лавхъсса оьруснал аьралуннал махIаттал бувссар щала Европа. ПаччахI Павел 1-нал дуллуссар Суворовлун Генерали­ссимуснал цIа.
ХIадур бувссар
А. Аьбдуллаевал