Лакрал, Ахъушиял ва цаймигу районнайсса хьхьичIсса никирал учительтуран ва дуклаки оьрчIан ххуйну кIулссар оьрчIан кIулшивуртту дулаврил ва ми тарбия баврил ххуллий хъунмасса захIмат бивхьусса, ТIюхчардал шяравасса Дадаев Рамазан Аьлибуттал арс.
Андриана Аьбдуллаева
Увну ур Рамазан 1917 шинал апрель зурул 15-нний Лакрал райондалийсса ТIюхчардал шяраву. ЧIумух бурувгун вайннал кулпат дусса кулпат бивкIун бур. Рамазан шанма оьрчI бусса кулпатраву чIина-чIивима ивкIун ур.
1937 шинал, колхозру дуллалисса чIумал, Аьлибуттал цинявппагу цала ятту-гъаттара хIукуматран буллуну бур.
ТIюхчардал колхоз хъунмурчIин ванал буллусса ятту-гъаттарая сакин хьуну дур.
Кулак хIисаврай танмихI бувминнал сияхIравун вагу агьанссия, республикалул профсоюзирттал къуллугърай гъанчу АхIмадов Кудулмямма къаивкIссания.
-Ци кулак тIий буру зу, мунал янна-уссух буругияра, — увкуну бур ванал. Укун ххассал хьуну ур Аьлибутта — учитель Рамазаннул ппу.
Рамазаннул арулва класс бувккуну бур Хъурхъив. ТIюхчаратусса цинявппа оьрчIру зунттайхчIин Хъурхъиял школалийн бучIайсса бивкIун бур.
АцIва класс ванал къуртал бувну бур КIундиннал школалий.
Та чIумал вайннал гъанчу Аьбдулгъани Аьлиев ВицIхъиял махIлалул ветврачну зий ивкIун ур. Рамазангу мунал аякьалулу ивкIун ур. Школа къуртал байхту, Рамазан увххун ур Гъумучиял педучилищалувун.
1938 шинал мугу къуртал бувну, Азирбижаннавун лавгун ур.
Тийх, Гянджа (Кировобад) шагьрулий, увххун ур шяраваллил хозяйствалул институтравун.
Ва институтрал ректорнугу та чIумал гъумучиричу ивкIун ур. Амма Рамазаннун институт къуртал баннин Дагъусттаннайн зана хьун багьну бур цува тIайла увксса кIанттурдай зун. Та чIумал хIукуматрал тIайла увксса кIанттурдая махъаллил хьун бучIину къабивкIссар.
Рамазаннул хъунмасса захIмат бивхьуссар 9 оьрчI ччаннай бацIан бан ва миннан тарбия дулунгу. Ххюва оьрчIал, буттал шаттирдайх лавгун, учительнал пиша язи бувгьуну бур.
Укун, гьан ув-увний зий, ванан Ахъушиял райондалий цимивагу школа баххана бан багьну бур.
Сайки 50 шинал лажиндарай лахъи лавгсса захIматрал ххуллу байбивхьуну бур 1938 шинал Ахъушиял райондалийсса Бутриннал байбихьулул школалия. Ва чIумал Рамазаннун оьрмулул 21 шин диркIун дур. Шикку ва зий ивкIун ур учительну ва завучну. Ца шинава гьан увну ур вара райондалийсса Гьитиннал байбихьулул школалул завучну. Шикку зий кIира шин шайхту, байбивхьуну бур Хъунмасса Буттал кIанттул цIанийсса дяъви. Дяъви байбивхьуну цалчинсса гьантрайва Рамазаннул хушрай дяъвилийн гьансса аьрза буллуну бур. Амма учительтуран бронь буну, къаувцуну ур.
Яла-ялагу дяъвилийн тIайла уккияра тIий укIлакIисса Рамазан, комиссиягу бувну, хIаписартал хIадур байсса курсирдайн Орджоникидзе шагьрулийн тIайла увккун ур. Амма ялагу фронтрайн гьан къаувну ур, лякьлуй операция бувну бушиву сававну.
Рамазаннунгу цIунилгу цала учительшиву дуллан багьну бур. Утти ва тIайла увккун ур завучну Уручуллал байбихьулул школалийн. 1942 шинал миччагу вара райондалийсса Нахкиннал байбихьулул школалул директорну гьан увну ур.
Дахьа нирхиравун агьайхту, ца кIаная цамур кIанайн тIайла уклай, цимивагу школа баххана бан багьну бур Рамазаннун. Ца шинава ва гьан увну ур Бархъаллал байбихьулул школалул директорну. Шикку зий ивкIун ур 1949 шинайн ияннин. Яла ивтун ур ЦIахъардал райондалий цIуну сакин дурсса пропагандалул ва агитациялул отделданул хъунаману. 1951 шинал Рамазан зана хьуну ур Бархъаллал школалийн директорну. Цува зузисса шиннардий Рамазаннул Бархъаллал школа мадара хьхьичIунмай хъит учин бувну бур. Жяматгу ваная хъинну рязину бивкIун бур. Амма кIира шинава цIунилгу ванайн цамур къуллугъ тапшур бувну бур. Рамазан зун ивкIун ур цал ЦIахъардал райком партиялул орготделданул хъунаману, яла шамилчинма секретарьну.
Ва къуллугърай ивкIун ур 1953 шинал ахирданийннин, район дукьан даннин.
1954 шинал ва тIайла увккун ур ЦIуссалакрал МТЕ-лул парторганизациялул секретарьну. 1959 шинал увчIуну ур Калининнул цIанийсса ТIюхчардал колхозрал председательну ва му къуллугърай зий ивкIун ур ххюра шинай.
Гихунмай Рамазаннул цIунилгу байбивхьуну бур учительнал ххуллу.
1964-1984 шиннардий зий ивкIун ур учительну ва завучну Ножайюртуллал (Чачаннал), Хасавюртуллал районнал школардай. Зий унува увххун, 1947 шинал бувккуну бур С. Стальскийл цIанийсса Дагъусттаннал педагогический институтрал (цIанасса ДГУ) филологиялул факультет. ТIюхчардал шяраву цалчин ларайсса кIулшиву ларсъсса инсан Рамазан ивкIун ур.
Рамазаннул бюхъу-бажар хIисавравун лавсун, личIи-личIисса шиннардий ва увчIуну ивкIун ур Бархъаллал, ТIюхчардал шяраваллал мажлисирттал, ЦIахъардал ва ЦIуссалакрал районнал мажлисирттал депутатну.
Оьрмулул ва захIматрал ххуллий лайкь хьуну ур чIярусса наградарттан: «За оборону Кавказа», «За победу над Германией», «За доблестный труд в ВОВ 1941-1945 г.г.» медаллан, КПСС-рал ОБКОМ-рал ва КIулшиву дулаврил министерствалул чулухасса ХIурматрал грамотарттан. Рамазан ия запасрайсса хIаписар. ХIукуматрал къуллугъирттай бивхьусса захIматрацIун, Рамазаннул хъунмасса захIмат бивхьуссар 9 оьрчI ччаннай бацIан бан ва миннан тарбия дулун. Ххюва оьрчI, буттал шаттирдайх лавгун, учительнал пиша язи бувгьуну бур. Миннава кIия математикалул учитель, шама оьрус мазрал учитель хьуну бур. Цинявнная личIи-личIину къабусланна. Ца арс ЩайхахIмад, оьрус мазрал учитель, чIярусса шиннардий ТIюхчардал школалул директорну ур. Ванащалсса интервью дуссия жул кказитрай ца-кIива номерданул хьхьичI («Илчи» №41).
ОьрчIру цивппагу, буттан зузисса кIанттурду ччя-ччяни баххана буллан багьаврийн бувну, личIи-личIисса щархъаву бувну бур. Хъунмур душ – Уручрав, шанма душгу, ца арсгу – Бархъарав, гайми мукьвагу оьрчI – ТIюхчарав.
Рамазаннун цанмагу лакку маз ва оьрус маз бакъассагу, 4 маз цаймигу кIулну бивкIун бур – даргиял, къумукьнал, азирбижаннал ва аьрабнал.
Шиккува бусан, хъунама арснал МахIаммадлул къуртал бувну бур Азирбижаннаву Гянджи шагьрулий бусурманнал семинария. ТIюхчардал шяраву ца ва ур теологиялул кIулшивуртту ларсъсса. 47 шинал лажиндарай цачIу оьрму бутлай, цинярдагу ласнал пишалуцIун дархIусса захIматшивуртту кIидачIлачIисса, нахIу-хIалимсса, тIюва дуручлачисса ххаллилсса оьрмулул дус хьуну бур Рамазаннун кулпат ПатIимат.
ХIакьинусса кьинигу Рамазан зий ивкIсса щархъаву, хаснува Бархъаллал шяраву, хIурматрай дакIнийн бутай вайннал кулпат.
ПатIимат дунияллия лавгунни 1988 шинал оьрмулул 70 шинаву. КIира шинава аьпалухьхьун лавгунни цува Рамазангу.
Ванал дарс дирхьусса оьрчIан ва тачIав дакIния къауккай, кIулминналгу ванал цIа хIурматрай зумух ласай.
[avatar user=»Andriana» size=»thumbnail» align=»left» link=»file»]Андриана Аьбдуллаева[/avatar]
