Дагъусттаннал 2 компания ххув хьунни «Экспортер года» тIисса Аьрасатнал премиялунсса конкурсрал Ухссавнил Ккавкказуллал федерал округрайсса ятIапрай. Вай гьантрай Ставрополлай ххув хьуминнан дуллунни наградартту.
«Промышленностьрал аралувусса шинал экспортер» тIисса номинациялий ва «Шинайсса хьхьичIуннайшиву» тIисса номинациялий ххув хьунни «Нива гринхаузис» тIисса элмулул ва производствалул комплекс. Мува номинациялий хъуннамур бизнесрал категориялий ххув хьунни «Каспийскаллал пюрундалул завод» АО.
«Шинал экспортер» тIисса гьарца шинал премия дулайссар цайми билаятирттащалсса дахIавурттаву экономикалуву хьхьичIуннайшивуртту хьун дурсса компаниярттан.
Премия сакин дурссар Аьрасатнал экспортрал центрданул.
Му ишираву гьуртту хьунни Ставрополлал улклул ХIукуматрал Председательнал хъиривчу Николай Афанасов, мува улклул экономикалул министрнал хъиривчу Сузанна Дамир ва цаймигу.
Дагъусттаннал чулуха гьуртту хьунни Дагъусттаннал экспортрал кумаграл центрданул каялувчи Руслан Абаскулиев.
Ванал махъ лавхъун махъ, наградартту дуллунни Дагъусттаннаясса ххув хьуминнан.
