ХIусанил арс ХIусаниев МахIаммад

Июльданул 20-нний оьрмулул 70 шинаву, хар-хавар бакъа аьпалухьхьун лавгунни Ххюлу­ссуннал шяраватусса ХIусаниев МахIаммад ХIусанил арс.
МахIаммад увну ур апрельданул 4-нний 1950-ку шинал Ххюлуссуннал шяраву. Школагу къуртал бувну, армиягу лавхъун махъ, тамансса шиннардий зий ивкIун ур шяраваллил культуралул къатлул директорну. Шагьрулийн ивзун махъ зий ивкIун ур МахIачкъалаллал троллейбусирттал паркраву, Дагпотребсоюзрал базалий ва цаймигу давурттай.
МахIаммад ия дакI-аьмал хъинсса, инсаннан кумаг бай­сса, чIарав ацIайсса, уздансса зунтталчу.
Ва бусравну ия гьарцагу цува зузисса кIанттай, чIахху-чIарахнал ва щалвагу жяматрал дянив.
МахIаммад аьпалул шаврил кьурчIишивугу кIидачIлай, жижара буллай буру кулпат Зали­ххахь, арс Заурдухь, душру Жамилахь, Дианахь ва махъсса цинявппагу гъан-маччаминнахь.
Имандалий лавгун лякъиннав, рухI хъинний дишиннав.

Ххюлуссуннал жямат

Ниттиуссиха

Чани-парсса яругу
Тихава хъяхъи бувну,
Уххайвав, ниттиуссуй,
Ина жул ялун мудан.

Гьарнан бусравсса ияв,
Чумартсса дакIнил заллуй,
Ина жула ушиву
Жун талихIрал бутIая.

Утти лавгунна ина,
Жугу хъап-хъаптIи бувну,
Жапасса цIуцIавурттан
Дарман лякъин къавхьуну.

Ина жул дакIурдива
ТачIав къаукканссара,
Пиш тIийннасса вил симан
ХьхьичI дарцIунна дикIанссар.
Ссил ва уссурваврал
оьрчIру

---

АьвдулвахIидлул арс ХIусманов Муса

Оьрмулул 88 шинаву аьпалухьхьун лавгунни ххаллил­сса лаккучу, захIматрал ветеран, ДАССР-данул лайкь хьу­сса хIакин, чIявучин бусравну ивкIсса, ЧIурттащиял шяравасса АьвдулвахIидлул арс ХIусманов Муса.
Увну ур Муса 1932 шинал ЧIурттащиял шяраву. Буттал шяравува 7 классгу къуртал бувну, увххун ур Буйнакскаллал педучилищалувун. Ахъушиял райондалий учительну зий дахьва 3 барз шайхтува, увцуну ур аьрали къуллугъ буллан Рига шагьрулийн. Гьунар бусса, дуккаврих гъира бусса жагьил ччяни хIисав хьуну ур частьрал хъуниминнан, кьамул увну ур Артиллеристътурал училищалувун. МарцIсса ххювардай училище бувккуну тIий, язи бугьан ивтун ур цува къуллугъ буллансса кIанттурду. Ваналгу Ттуплис язи бувгьуну бур. Ттуплислив цIусса дяъвилул техникалул иширтталсса буллалисса даврий 3 шингу дурну, кIура авну ур Дагъусттаннайн. Яла, махъунай школалийн зана къавхьуну, ларайсса кIулшиву ласунсса умудрай ув­ххун ур Мединститутравун.
1964 шинал марцIсса ххювардай Дагъусттаннал мединститутгу къуртал бувну, Муса увкIун ур Лаккуйн. Му хъинну гьунар ххисса хIакин, инсаншиву дусса гьалмахчу ушиву чIирисса чIумуй чIявуссаннан кIул хьуссар.
1972 шинал Муса Гъумучиял азарханалул хъунама хIакинну ивтссар. Шиккурив хъиннува чIалан бивкIссар Муса цила багьайкунсса, зузалт лагма лаган бан кIулсса, итххявхсса каялувчи ушиву. Ккаккиялунну 14 шинай хъун хIакиншивугу дурну, муния мукьахгу, цума хъун хIакин учIарчагу, цими аххана хьурчагу, мудан хъунаманал хъиривчуну зузисса Муса Аьбдуллаевич азарханалун чара бакъа аьркинсса хIакингу, инсангу ивкIссар. Ванал лакрал (лакрал бакъассагу, чIаххувсса районнал жяматиртталгу) цIуллу-сагъшиврул ялув бивхьусса захIмат хъинну хъунмассар. Муса Аьбдуллаевичлул лакрал азарханалул тарихраву кьариртссар ххуйсса цIа.
ХIукуматрал бивщуссар ванал даврин кьимат, ванал хIалал дурссар «ДАССР-данул лайкь хьусса хIакин» тIисса бусравсса цIагу. Лайкь хьуссар чIярусса грамотарттан, барчаллагьрал чагъардан. Амма яла хъунмур кьиматну хьуссар халкьуннал дакIнийхтуну тIутIисса барчаллагьру.
Муса аьпалул хьусса хъунна­сса кьурчIишивугу кIидачIлай, жижара буллай буру кулпат Сиябатлухь, арсурваврахь Аьбдиннухь, Хайруттиннухь, душнихь Зулпижатлухь, уссур-ссуннахь, щалвагу агьлу-авладрахь.
Цал гьав нурданул дуцIиннав, алжаннул ххари аннав. Махънал оьрмурдай барачат бишиннав. Амин!

ЧIурттащиял жямат

Мусилавл арс Исмяилов ХIажи

Хъун бакъасса хIаллай къашавайгу ивкIун, оьрмулул 82 шинаву жуятува батIул хьунни персональний пенсионер, захIматрал ветеран Мусилавл арс Исмяилов ХIажи.

ХIажи увну ур 1938-кусса шинал Хъусращиял шяраву. Ккуллал дянивмур даражалул школа бувккуну махъ увххун ур МахIачкъалаллал шяраваллил хозяйствалул техникумравун. Яла заочнайну къуртал бувну бур Дагъусттаннал шяраваллил хозяйствалул институтгу.
ХIажинал захIматрал ххуллу байбивхьуну бур Казбековлул цIанийсса колхозрал зоотехникну зий. Ва увчIуну ивкIссар Ккуллал райком ВЛКСМ-рал цалчинма секретарьну. Мичча зун увцуссар Ккуллал райисполкомрал председательнал хъиривчуну.
1980-ку шинал ХIажинайн тапшур бувссар Ккуллал райком КПСС-рал кIилчинма секретарьнал къуллугъ, ва му даврий зийгу ивкIссар 1991-ку шинайн ияннин.

ХIажинал бивкIу бювххунни Ккуллал райондалул агьалинан, мунащал зий бивкIсса гьалмахтуран, оьрмулул дустуран. Ванал дакIнил хъиншиврул бутIа бив­ссар хъинну чIявусса инсантуран. Хъинну чIявусса хьуссар му гьурттуну райондалий бартбивгьусса, цаннияр ца хьхьичIунсса ва агьамсса мурадру. Райондалий къуллугъирттай зий ивкIсса цимиягу вакилнан ХIажи хьу­ссар аькьилсса маслихIатчину ва дакI цIуцIисса чIарав ацIуну. Ванал хIалал дурссар хIукуматрал чулухасса диялсса хIурматрал грамотартту ва барчаллагьрал махъру.
Жуна цинявннанагу бусравну ивкIсса ХIажи аьпалу­хьхьун лагаврил пашманшивугу кIидачIлай, дакIнихтунусса жижара буллай буру ванал кулпатрахь, арсурваврахь, душнихь. Цал рухI рахIатний дишиннав. Махънал оьрмурду лахъи баннав.

Ккуллал райондалул жямат