[dropcap]И[/dropcap]юльданул 2-нний Дагъусттан Республикалул БакIчи Владимир Васильев хьунаавкьунни БувчIавурттал комиссиялул председатель МахIаммад Дибировлущал. Шикку ДР-лул ИК-лул каялувчинал балжину бувсунни Республикалул БакIчинахь хьусса бувчIавурттал аьмсса тагьардания.
Залму АьбдурахIманова
— Лахьхьу, июльданул 1-нний, низамрайн бувну, ахттакьун бизулул ссят 8-нний жулла республикалий бувчIавуртту най диркIсса циняв кIанттурду лавкьуссар. Гьан-бучIан захIматсса, архсса муниципалитетирттай чIурду булаву дайдирхьуну диркIссар июньдалул 21-ннийра. ХIисав бувну, му кьинилия июльданул 1-ннийнин чIурду буллуну бия 78% дагъусттанлувтурал. Щала билаятрал бувчIавурттал агьаммур кьинилул хIасиллая махъ тIурча, чIурду буллуну бур жула агьалинал 89,99%. Миннувагу Конституциялий дахханашивуртту дан рязину бур 89,91 % ва къаршинугу бур 10,24%, — куну, бувсунни МахIаммад Дибировлул.
Щалагу билаятрай гьуртту хьуну бур халкьуннал 65 %. Аьрасатнал Федерациялул ЦИК-рал бусаврийну, ттинин вайннал ххал бивгьуну бур июльданул 1-ннин хьусса щала билаятрал бувчIавурттал хIасиллу дуллалисса протоколлал 97,03 %. БувчIавурттан хасъсса хIасиллал батIаврий Аьрасатнал ЦИК-рал председатель Элла Памфиловал кIицI бунни аьрасатлувтурал 78 % рязину бушиву Конституциялий дантIисса дахханашивурттай. Къарязиссагу хьуну бур 21,13 процент агьалинал.
Ванал кIицI бунни гьашинусса бувчIавуртту най диркIшиву Роспотребнадзорданул тIалавшиннугу дурурччуну, коронавирусрал азар ппив къахьунсса куццуй, агьали буруччинсса чараннугу ишла бувну.
— БувчIавуртту нанисса гьантрай жучIан низам лиян дурсса иширттая баян буллалисса цурда ца оьвчаву къархьунни. Жул зузалт мукунсса иширттал хъирив бавцIуну бивкIссар социал сетирдайхчIин ва миннуйхчIин дахIаву дурну бивкIссар халкьуннащалгу. Миннаясса чIири-хъунсса рязибакъашиврул хъирив бувккун бивкIссар щалагу чIумул манзилданий, — ххи бунни комиссиялул председательнал.
ДР-лул БакIчи Владимир Васильевлул, БувчIавурттал комиссиялул зузалтрахь дурсса хъуннасса даврихлу барчаллагьгу куну, кIицI бунни ва захIматсса чIумал, хаснува зунттал районнай, бувчIавуртту республикалий лахъсса даражалий ва низамрай хьушиву.
— Барчаллагь учин ччай бур ва билаятрал даражалийсса хъуннасса давриву чялишсса гьурттушинна дурсса цинявгу дагъусттанлувтурахь. Конституциялий дахханашивуртту дуван рязиминнал тасттикь буллалиссар жула Президентнал тIайласса ххуллу бувгьуну ушиву ва вания гихуннай дувантIисса давурттугу Аьрасатнал сий гьаз дувансса, жула агьалинал оьрмулул дуцинну бюхттул дувансса мурадрайсса душиву, — увкунни Владимир Васильевлул.
БувчIавуртту нанисса кIанттурдай зий бивкIсса комиссиярттал вакилтурахь ва хъиривбацIултрахь бувсса захIматрахлу барчаллагь тIий, Республикалул БакIчинал кIицI бунни билаятралгу, республикалулгу каялувчитурал даврил мурад вания гихуннайгу агьалинал ихтиярду дуруччинмур буллансса, украсса кIулшивуртту дуллансса ва медициналул хIаллихшиннардил щаллу буллансса ниятрайсса душиву.
-Агьалинал цIаний биттур бан аьркинсса жуйвасса бурж жунма, каялувчитуран, мудангу кIулну бикIан аьркинссар. Щак бакъа, дахханашивуртту дан рязисса гьарца инсан умудрай уссар жунма ми буржру биттур бан аьркиншиву кIулссар тIий. Жула мурадгу хъанахъиссар миннал умудру дузрайн буккан баву. Республикалий дуллалисса гьарцагу даву социал масъалартту щаллу бан щурущи дурсса дикIан аьркинссар. Вих хьун ччай ура, уттинин жура дурсса давурттах бурувгун, дахханашивуртту дан рязими гьарзассагу мунияту бухьуви тIисса пикрилийн, — увкунни хьунабакьаврил ахирданий Владимир Васильевлул.
