[dropcap]Д[/dropcap]агъусттаннай ца агьамсса масъала хъанай бур Каспийскаллал хьхьирил щинал тагьарданийн багьайсса масъала. Вай махъсса шиннардий тIабиаьт дуруччавриха зузисса
хасъсса специалистурал дурсса ххал бигьавурттайн бувну, хьхьирил щин дусса дур хъинну чапалну. Мунин сававгу хъанай дур халкьуннал тIабиаьт дурукъаччаву, муних баччи бакъулшиву даву.
ХьхьичIва Каспийскаллал хьхьириву чIявусса личIи-личIисса журалул балугъру бикIайссия. Уттирив ми, кьинилия кьинилийн чан хъанай, азардал бувгьуну, ливтIуну най бусса бур. Дагъусттаннал ттиркьюкьилун ккаллисса хьхьири, фабрикарттава ва заводирттава ччюрк, навтлил ххиличIрурду дичлай, кунцIуллуйн буккан бавай бур. Браконьертуралгу, рахIму къабувну бугьлай, тIабиаьтраву укунмагу чанну ливчIсса балугърал журарду бухлаган бавай бур.
ТIабиаьт муксса караматсса зат дурхха, хьхьирирдугу, бярдугу цайнува цивппа марцI буккайсса бур. Каспийскаллал хьхьири тIурча, мукунсса даражалийн биян бувну бур, вания тихунмай хьхьирил щин, цайнура цурда марцI къадуклай, оьлуркъунна личIлай дусса дур. Каспи хьхьири хъирив лаллай бакъар уттизаманнул халкьуннал анаварсса бущилий чапал дуллалисса щинал тагьарданущал ччалан.
Агарда хIакьинусса кьини жува ва масъала къулагъас къадурну кьабитарча, бюхъайссар ва халкьуннайн къаршину кIура баен. Мунияту халкьуннангу, хIукуматрал бакIчитурангу бучIия уттива ва балаллул хьхьичI баруну бацIансса чараннах луглан.
Камила МахIаммадова,
ДГУ-лул филологиялул
факультетрал журналистикалул отделениялул 3-мур курсирал студенткал
