[dropcap]И[/dropcap]нт дуркIун махъ биялсса хIал хьуна ттун ца лелуххул балайлул чIу баллай. Му балайлул чIу цуппагу баллан бивкIуна, нава яхъанахъисса Вихьуллал шярава увккун, даврийн най, шяраваллил хьхьичIсса Майралу тIисса кIанайн ияйхту.
Баргъбуккавал чулийсса Оьмал-БакIул ухчIиннийсса кьунттучIату баллан бивкIуна лелуххул ца аьжаивсса, кутIасса балайлуха лавхьхьусса, чIу. Ттун бакIрайва га чIу буллалисса лелуххи, нава най ххал шайхту, цуппагу дунияллий бушиву ттухьва бусласисса кунма бивзуна.
Гания махъ утти, вай гъидайдихьулул гьантрай, тава балайлул чIу цайми кIанттурдаватугу баллан бивкIуна. Оьмал-БакIул чIарахсса БакIух-РатIгу махъ кьадиртун, ххуллу най буссар Ххариялу тIисса кьасса лухччинийх. На тиккун ияйхту баллан бивкIуна гава лелуххул балайлул чIу. АвцIуну, лагма уруглан икIайхту, янилун багьуна ххуллул лултту чулий ца кьаркьсса ганзсса ххурттарай щябивкIун га чIунил заллу. Га лелуххи цуппагу, чIелму кунма, чIивисса бия. Ттун бувчIуна га иштIанкIу бушиву. Амма, сурат рищун фотоаппарат букканнинсса мажал ттухьхьун бириян къабивтун, левххун лавгуна.
Ялагу гихунмай, ЦIуйшиял шяравату ливчуну, багърал чIарах ачайхтугу, баллан бивкIуна гава чIу. Гиккусса ццунсса мурхьирдал иштIанкIу янилун багьан къабивтуна. Ваччавгу ивну, шяравун ухлахисса чIумал, ххуллул лултту чулийсса къатрал хьхьичIсса ахъаватугу баллан бивкIуна «ттула иштIанкIул чIу». Иширах бургарча, га кьини ИштIанкIул кьини духьунссия.
Га кьини на ттула даврил аьрххилий лавгссияв Хъусращиял ва Ккуллал шяраваллавунгу. Ккуллал гьазтIи-ламул сурат рищун аглан хьуну унува, ттун ялагу ламул лувсса къатIрачIату гава балай бавуна. Караматшиву, махIатталшиву му дияхха га кьини дунияллий, га ца иштIанкIул чIу бакъа, цайми чIурду бакъасса хханссия. На навагу ххаришиврул виувцIунав. Ца чIивисса лелуххулгума инсаннал дакIнил мутта тIутIайх бичин байшиву га кьини хъиннува ххуйну кIул хьуна. Гьай-гьай, ва ишгу жулла Ватандалул аьзизсса суратирттавасса цар.
