Дагъусттаннайн кьини дурксса чIумал, цала къатта-къушругу кьабивтун, азарханардайва яхьуну, хьхьу-кьини къаувкуну лавмартсса коронавирусрал азарданул
ххяппурттаща инсантал ххассал буллай бивкIсса медициналул зузалт жува ттигу цимилагу барчаллагьрай дакIнин бичинссар, цимилагу лахъа-хъун банссар. Лайкьссар вайннал виричушиву ччимур хIурматран.
Андриана Аьбдуллаева
Пандемия сукку хьусса тай захIматсса шартIирдай, медициналул цайми идарарттан кунна, хъуннасса хъар лахъан багьссар Каспийскаллал азарханалунгу, хаснува инфекциялул отделениялун. Ва отделениялий зузисса медициналул сестра Аьлилова Таибат Бархъаллал шяравасса Камиллул ва Гулисттаннул душри. 2015-ку шинал Ставрополлал базовый медициналул колледжрал «лечебное дело» факультетгу къуртал бувну, Таибат бувкIун бур ва азарханалий зун, цIанасса чIумалгу шиккува зий бур.
Коронавирусрал пандемия сукку хьусса чIумал Таибатгу «ятIул зоналий» зий бивкIун бур. Укун дакIнин дутлай бур тай захIматсса кьинирду Таибат.
— Коронавирусрал цалчинсса инфекция дусса къашайшала жул азарханалул кьамул увссар мартрал 24-нний. Му кьамул увссия нагу, отделениялул заведующая Ромас Ириналгу. МахIачкъалалив му чIумал коронавирусрал къашавайминнансса госпиталь тIивтIуну бия, жу му шихун увцуну бувкIссияв. ЦIубутIуй жун ва азар бувчIин захIматсса ссигъану хьуна. Чурххан тIааьн дакъасса хасъсса янналуву зун бигьану бакъая. Ялун бурувгун къашайшала оьккину чIалай акъая, мунал цIуцIиссагу цичIар дакъая. Так му къашавайнащал хIалашиву дуну ивкIун ия. Дагъусттаннай цалчин официалнайсса обследование дурсса къашайшала вари хьусса. Цинярда аьркинсса анализругу дурну, документругу щаллу бан багьлай бия ттун. Хасъсса костюмирттаву зун бигьану бакъая. Къашайшала уттуишин увсса изолятордануву кIиришиву дия, очкив гьухъа битлай, зад ххуйну чIалай дакъая. Пандемия дайдирхьусса цалчинсса нюжмардий жу хъанахъимур къабувчIлай бивкIру. Ялу-ялун цIу-цIусса къашайшалт бавчукун, миннал захIматсса тагьар чIалан диркIукун, жун бувчIуна халкьуннал ялун хъунмасса бала бивну бушиву. Цинявппагу медициналул зузалтран хъама бивтуна цалва къатта-къуш, даврил кьатIувсса оьрму. Жу зун бивкIру хьхьу-кьини къаувкуну. Заннайн дуаьлий бивкIру, вай захIматсса кьинирду ччяни яла ласи тIий. Жу бувчIин буллай бивкIру жула гъан-маччанан, гьарица инсаннан ва нигьачIаву хъуннасса азар душиву, баччибакъулшиву мадару тIий леххаву тIий бивкIру. Амма чIявуми, вай политикалул тIуркIурдур тIий, вих хъанай бакъая. Карантиндалия баян ччай бакъая. Мунилгу иш хъиннува оьнивун бувтунни. Жун хъинну сси-къащи хъанай дия, жува жула кулпатругу кьабивтун укун захIматсса шартIирдай зий, инсантурал жула леххаврих къулагъас къадуллалиний. Та захIматсса чIумал зузалт хъинну кувннал кув бувгьуну бия. ЧIявуми цивппагу къашай хьуна. Хъин шайхту, ялагу цала давурттайн бувккуна. Та тагьарданул аьч бувна медициналул зузалтрал хIал. Оьсса балаллущал талай, миннал цинявннал лайкьну лархъунни та кьини. Ттун ттунма оьрмулул гьарицагу лахIзалул кьимат бувчIунни. На ца лахIзалийссавагу пашман къавхьура нава ва пиша язи бугьаврия, ялунгума ххарину бивкIра укунсса чIумал ттущава инсантуран кумаг бан хъанай тIий. Бухлай-бавкIлай бушивруцIун, жул нярайнгу гуж багьлай бия. Гьарица къашайшала нахIусса, дакI дансса махъ бувсун паракьат ан багьлай бия. Миннаву хъунмасса ццах бия, ми аьраттал буклай бия, вихшала кьуркьуну бия. Жу хIарачат буллай бивкIру, цуксса жунма захIматну бунугу, пиш тIун, жула буххаву-бавчIаву чIалачIи къадан. Яла хъуннамур ххаришиву дикIайва хъин хьусса къашайшала азарханалия тIайла уклакисса чIумал. Ми жуха, дуаьрду дуллай, зукьлай бия. Му ппурттуву хъиннува бувчIайва жулва захIмат хIазрансса къабивкIшиву. Я Аллагь, къаккакканнав жунма укунсса бала тачIав.
