[dropcap]Г[/dropcap]ьарцагу инсаннал ва дунияллий бур цанма яла ххирасса, яла аьзизсса, цува мудангу кIункIу тIий икIайсса, дакI рахIат дуккайсса кIану.
Ттулгу бур мукунсса кIану – мугу Ккуллал райондалийсса Хъусращиял шяравалу. Шикку дунияллийн бувкссар, оьрму бутлай бивкIссар ва цалла ахир-мина ляркъуссар ттул буттал буттал буттахъал, ттул гъан-маччаминнал.
Хъусращи – цIа дурксса аьлимтурал, шаэртурал, балайчитурал минар. Ттун хъинну ххирар ттулла шяравалу, ххаришиву ва пахру бикIай укунсса шяраву ляхъансса бахтти-талихI ттунма шаврия. Хъусращиял шяраваллил республикалунгу, дунияллунгу пишкаш бувсса чIявучин кIулсса пишакартурал цIардал сияхI лахъисса дур. Дагъусттаннай цалчина-цалчинсса пишакарсса художник – Пянтур ХIажи ттул ниттил ниттил ниттил ппур, Аьрасатнал Федерациялул лайкь хьусса кулинар АхIмад Иллаев ттул ниттил ниттил ппур, Дагъусттаннал халкьуннал учительнал цIанин республикалий цалчин лайкь хьусса ХIасан АхIмадов ттул буттал ниттиуссур.
Ххирар ттун Хъусращи цилла авурсса тIабиаьтращал ва бявкъусса гьаваращал. Гьарца гъинттул бияра аьзизсса шяравун.
ЧIявур шяраваллил лагма-ялтту итталун багьансса, хIаз бизансса кIанттурду. БацIанна миннувасса кIинний: КкутIду-Мурлу (Оконце в скале) ва ЧатIкьалу (Священная поляна).
ТачIав дакIния къадукканссар нава хьхьичIва-хьхьичI КкутIду-Муруллуйн лавхъсса чIун. Ва, дянив ккурккисса «чIавахьулугу» бусса, хъинну лахъсса ва тик бивкIсса мурлур. Га дия дарщусса кьини. Ссилгу, навагу пикри буварду, ци хьунгу, Муруллуйн лавхъун, мунил дянивсса «чIавахьулттивух» бурган.
Ччех бикIлай, багьлай, бизлай, гуж-къиялий ахиргу лавхъру. КIа «чIавахьулттивух» бурувгукун, жул хьхьичI тIиртIуна караматсса дуниял. КIикку канакисса щарнил кьяцри ккавккунгу, жу хъиннува махIаттал хьунав. КIия ялавай бучIангу къабигьану бия. Ва хьуна ттул Хъусрахьсса цалчинсса ххувшаву. Му кьини жу оьну бувххунав, кару ва ччанну ххирххуна, амма я буххаву, я къюву кIул хъанай дакъая Мурлу мютIий бувсса ххаришивруха.
Гъинттул щарнил инсантуран ххирассар цIа дурксса щайх увччусса ЧатIкьалу тIисса кIанайн занан. Миккун нанийни, инсантурал цащалва ласай чIявусса цIугу, аьгъушивугу, ппиринжгу: цIу – зунттал аврдан; аьгъушиву – щайхнал чак буллай ивкIсса чару аьгъу буван; ппиринж – лелуххантран. Шиккун бачин хьхьичIгу аьркинссар щинавун бучIан, дуаьрду дуван, оьрмулуву цанма хьуну ччимур дакIний бугьан.
Ххуллу архсса бушивугу хIисавравун лавсун, аьрххилий буккайссар ттукрай.
Ттул хиял бикIайссия ва авлахърайн биян, амма мудангу оьрмулул хъуниминнаясса жавабран баяйва: «Цал хъунма хьу, вища архсса ххуллу бухIан къахьунтIиссар», — тIисса махъру. Ахиргу бувкра на ва аьрххилий. Хьхьунил ссят шамунний, ттукрайгу щябивкIун, бувкру ххуллийн. Ва аьрххилий буккан аьркинссар, тIар, марцIсса дакIнищал ва хъинсса пикрирдащал.
Мяйжаннугу ххуллу архсса ва захIматсса бивкIун бия. Ттун нава щябивкIсса ттуккуй цIими хъанай бия, ххишалану бахьтта бачинмур буллай, цинявннаяр махъун багьлай, оьрмулул хъуниминная ттуйн аьй дуркIуна. Ххуллийх хьунадакьайсса рухI дакъая, лагмара – паракьатшиву ва пахъдагьру. Ххуллул лагма-ялттусса щинтасса щюлли урттуй ва ранг-рангсса тIутIай тамаша буллай, чIун-чIумуй зунттал щаращал дяркъу щинал нахIалагу буллай най, ахиргу бивру чIаку авлахърайн – щайхнал чак буллай ивкIсса кьунттучIан. Муних урувгманан хIисав хьунну чIалай бур чак буллалисса инсаннал къалип. КьунттучIату арх бакъа бур лагма-ялтту бикIанмагу бусса ца мурхь, цийгу личIи-личIисса яннардал кьютIру бавхIусса.
Жу, чакругу бувну, му мурхьирал къяртрай бахIарду бакIрайн бутай мурцIу. Пахъдагьру… ДакIниву паракьатшиву ва куклушиву, жувагу ва бюхттулсса, инсаннайн мютIий дакъасса тIабиаьтрал ца бутIану чIалай бияв… Лагмавасса бюхттулсса зунттурдал, цала вив лавсун, ябуллалисса хханссия ва рувхIанийсса майдан…
Шаппай зана хьуру маркIачIанмай, ца хъинну хъунмасса, жаваблувсса бурж биттур бувсса кунмасса асардащал. Шаппами жух ялугьлай бия хIажлия наниминнах кунма. Ва аьрххилия махъ нава оьрмулул биялну хъунма хьусса кунма, гъан-маччами ттухва цайми яруннах буруглагисса кунма бивзуна.
Ва хьунни на мютIий дурсса кIилчинсса лахъшиву. Гихунмайрив – кIул бакъасса цIу-цIусса ххуллурду, хIаз-хIазсса тIитIалартту.
Лажин хIадур дурссар
Камилла АьвдурахIмановал,
ДГУ-лул филологиялул
факультетрал журналистикалул отделениялул 3-мур
курсирал студенткал
