[dropcap]У[/dropcap]рчIра шинавусса, МахIачкъалалив яхъанахъисса оьрчI, Ибрагьим МахIаммадов цала бизнес дачин дурну ур. Ва гьуртту хьуну ур «Фабрика.
ОьрчIру» тIисса федерал проектрай, Ломан Браун гьаннарал аьнакIал ферма дувансса бизнес-ниятрай. Проектрай тIайлабацIу буну гьуртту хьуну мукьах, аьнакIивгу машан лавсун, миннунсса къатта бувну бур. Вана, шамилчинсса барзри чIава бизнесмен аьнакIал фермалуха зий. Ибрагьимлул гьантлун 30 ккунук батIайсса бур, мигу гассят машан ласайсса бур.
«Инсантуран экологиялул марцIсса продукция ччиссар, ттул аьнакIи, ххуйсса къама бичлай, марцIсса щин дизлай, гьавалийн итабавкьуну, ххуйну ябуллалисса аьнакIиври, миннул ккунукругу нахIуссар», — тIий ур Ибрагьим.
Ванал, аьнакIивгу гьарза бувну, бизнес лядуккан дувансса хиял бур, иш бачин кабакьу буллалисса аккаунт дур инстаграмрай. ЧIа учинну чIава бизнесменнан хияллу дузрайн буккансса тIайлабацIу!
П. Рамазанова
