[dropcap]Д[/dropcap]акIнийн бутанну, Аьрасатнал хIукуматрал билаятрал демографиялул тагьар къулай даву мурадрай, 2007 шинай цIакь дурсса программар ниттил (кулпатрал) капитал. Шиная шинайн му капиталданул багьа гьаз хъанай буссия, 2007 шинал,
масалдаран, кIилчинсса оьрчI бувсса кулпатран ккаккан дурну дуссия 250 азарда къуруш, хъирив шинал – 276 250 къуруш, 2009 шинал тIурчарив – 312 162 къуруш. Вава даражалий шиная шинайн гьаз хъанай буссия капиталданул багьа.
П. Рамазанова
Гьашинурив программалул къулайшиннартту ххигу, хъунигу дурссар. Март зурул цанний 2020 шинал ниттил капиталданул программалуву дахханашивуртту дурсса федерал закон цIакь дурссар. Ми дахханашивурттай бацIанну: цалчин, программалул чIун лахъи дуккан дурссар, ниттил капитал буллалиссар 2026 шинал ахирданийннин. КIилчин, гьанулун ласунсса дахханашивур капиталданул багьа лахъ баву ва му цалчинсса оьрчI бувайхтува буллай бушиву. Ва уттисса шинал январь зурул цанния байбивхьуну, оьрчI бувсса ягу арс-душ цалашиврий бивхьусса кулпатирттан ккаккан дурну дуссар 466 617 къуруш.
Гьашинуния тинмай кIилчинмур оьрчI бувсса кулпатирттан тIурчарив, ххи дуллалиссар ялагу 150 азарда къуруш. Ми хъанахъиссар аьмну 616 617 къуруш. Вайкссара арцу дуллалиссар шамилчинсса, мукьилчинсса ва ххишаласса оьрчIру бувсса ягу оьрчI бувцусса кулпатирттангу, агар хьхьичIва кIива оьрчI ниттил капиталданул программа дукканнинма бувну бухьурча. Яни, му кулпатрал ниттил капитал хьхьичIва къалавсун бивкIхьурча.
Мукунма, цIусса дахханашивурттайн бувну, ниттил капитал ишла буван бучIиссар участокрай цIусса къатри бувайнигу. Гьай- гьай, му участокрал заллухъру бушиврул документру бухьурча кулпатрахь. Му бакъассагу, 2021 шиная тинмай капитал ласаврил чIун кутIа дурссар, аьрза буллуну мукьах, документру кьамул бувсса-къабувсса мяйжан буван аьркинссар ацIва зузи гьантлул мутталий, документру тIайлашиву исват шайхту, сертификат дулун аьркинссар ххюва гьантлул дянив. Зунма ниттил капитал багьлай бухьурча, чIумуй документругу бавтIун, хъирив буккияра.
Макьала хIадур дурссар Аьрасатнал Пенсиярттал фондрал официал сайтрайн (http://www.pfrf.ru) чул бивщуну. Зунма цIуххинсса, мяълум бансса бухьурча, ва сайтрайн буккияра.
