[dropcap]Ж[/dropcap]ул Вихьуллал шяраву чIурду буллансса участок хIасул дурну дия шяраваллил культуралул къатлуву. Ва участокрал хъунаману ия МахIаммадов Аьлил.

Комиссиялул членталну бия. СайкIуев Ражав, Мусаев Муса, Кьадиев ХIасан, Оьмариева Камилат,

Халилова Шамсият. Жунма кIулсса кьяйдалий, жучIанна цакуну дуркIсса коронавирус тIисса цIуцIаврия инсантал буру­ччиншиврул, чIу булавуртту сакин дурну дур июнь зурул 25-нния, июль зурул 1-ннийнин. Мунияту на чIу булунгу, чIурду булаву цукун най дурив цIуххаву дангу, лавгссияв чIурду буллай байбивхьуну шамилчинмур кьини. Конституциялийнсса ххи бавурттахлу чIу булайхту, на ца-кIива суал буллуссия ва участокрал комиссиялул член Кьадиев ХIасаннухьхьун.

---

ХIажимурад ХIусайнов
— ХIасан, цукун най дур чIурду булавуI Дурив ми дахханашивурттаву жула зунттаву яхъанахъисса инсантуралмур оьр­мулувугу дучIи лякъинмурI
— ЧIурду булун сияхIрайн лавсъсса Вихьуллал шяраваллил участокрайсса 702 инсанная хIакьинунин (чIурду буллай шамилчинсса кьини) чIурду буллунни 40% инсантурал. Хъиннува чIявусса бия цалчинмур кьини. Ялагу жула инсантал рязину бур Конституциялий дуллалисса дахханашивурттай.

Жула жагьилсса нитти-буттахъал оьрчIан, гай ччаннай бацIан буван, арцуйнусса кумагру булланшиву буслай бур. Бугьара хьусса нитти-буттах гайннал оьрчIал чара бакъа ургъилшиву дикIан багьлагьишиву кьануннайну цIакь буллай бур. Нину-ппу бакъасса, ягу цамур иширай ятинталну ливчIсса оьрчIах бургаву хIукумат цила бакIрайн ласлай дур. ТIабиаьт дуруччавугу жуйнмагу багьлай бур.

Мунихгу ябитаншиву буслай бур. ХIасил, цинярдагу Конституциялуву дуллалисса бакьин бавур­тту жула зунттавусса инсантурал оьрмулувугу хъин чулиннайссану хъанай дур.

[dropcap]Ш[/dropcap]иккува ххи бан ччива, чIурду булаврин аьркин­сса хIаллихшиннарду хъинну кIанийн дуртун щаллу дурну дур. Дур чIу булун увкIнал лаххайсса маскарду, катIри, каруннайн пурх учин дайсса антисептик. Ххал дувайссар чIу булун увкIманал чурххал кIиришивугу. ХIадур бувну бур, шиккун участокрайн бучIан къабюхъла­хъисса бугьарасса инсантурачIан шаппайн лавгун, гайннал чIу буллалисса бюллетень бутансса чIивисса къурши.
Яраппий, барачатну лякъиннав жунна цинявннан паччахI­лугърал Хъунмур закондалий дуллалисса дахханашивуртту!