[dropcap]И[/dropcap]юль зурул 21-нний Да­гъусттаннал ХIукуматрал председатель Артем Здуновлул видео-конференциялий ххал бивгьунни Worldskills чемпионатрал тIалавшиннардайн бувсса, захIматрал пишарду хьхьичIунмай баву мурадрайсса, ресурсирдал центрду тIитIаврин хас бувсса масъалартту.

Имара Саидова
Микку гьурттушинна дунни ДР-лул ХIукуматрал Председательнал цалчинма хъиривчу Анатолий Карибовлул, Да­гъусттаннал кIулшиву дулаврил ва элмулул министр Уммупазил Оьмаровал ва цаймигу министерстварттал ва идарарттал каялувчитурал.
Worldskills «Жагьилсса пишакартал» тIисса миллатир­ттал VIII-мур чемпионатрал финалданул бяст-ччаллу гьашину цалчинни манзилданул режимрай хъанахъисса. Чемпионатрал бяст-ччаллу байбихьлай бур сентябрьданул 6-нний ва ми най бикIантIиссар сентябрь зурул 21-ннийнин. Миву гьуртту хьунтIими язи бугьлагьисса соревнованиярттугу хьунтIиссар август зуруй, мура манзилданул режимрай.
Жагьилтал давурттал щаллу байсса «Успех» тIисса центрданул директор Тамерлан Бу­гъановлул бусаврийн бувну, август зурул 1-нния 20-ннийнин най бикIантIиссар 16 журалул пишардал усттаршиву кка­ккан дуллалисса бяст-ччаллу ва миннул хIасиллайн бувну язи бугьантIиссар финалданий гьуртту хьунтIисса пишакартал.
Чемпионатрал финалданий гьуртту хьунтIиссар строительствалул ва штукатуршиврул даврил, электромонтажрал, туризмалул, веб-дизайндалул, шяраваллил хозяйствалул машинартту зузи баврил, физкультуралул ва спортрал, сварка даврил технологиярттал, школалийн бачиннинсса кIулшивуртту дулаврил, ишбажаранчишиврул ва мюрщими классирттаву дарсру дишаврил пишардал усттаршиву ккаккан дурсса оьрчIру ва душру.
Артем Здуновлул кIицI лав­гунни бюхъайсса куццуй чIарав бацIан аьркиншиву жула жагьилсса пишакартал, бяст-чча­ллаву лайкьну гьурттугу хьуну, хьхьичIунсса хIасиллащал зана хьуншиврул.
Совещаниелул ахирданий Артем Здуновлул республикалул предприятиярттал пишакартурайн тапшур дунни жагьил­сса пишакартал чемпионатрайн хIадур баву ва шайсса куццуй миннал чIарав бацIаву.