Цума ухьурчангу хIакиннал давринсса яла лаваймур кьиматну хъанай бур къашайшалтрал чулухасса рязишиву. Вай гьантрай редакциялийхчIин барчаллагь учин бувкIунни Да­гъусттаннал паччахIлугърал

Медициналул университетрал ортопедиялул ва стоматологиялул кафедралул ассистентну зузи­сса хIакин-стоматолог ХIажиев Аьвдул­кьадир ХIажиевичлухь. Ши­ккува кIицI лаган, Аьвдулкьадир ХIажиевичлухь барчаллагь тIисса чагъарду редакциялийн ваниннингу цимилгу бувкIссия.

---

Имара Саидова
Гьай-гьай, къашайшалтрал чулухасса бусравшиврулли тасттикь буллалисса хIакиннал даврил ларайсса пишакаршивугу.
«Ттул даврил мурадгу, ттучIанма вихшалдарай бувкIминнаха дакIнихтунусса аякьа давур», — тIий ур хIакьинусса кьинигу цала даврил опыт студентътуран лахьхьин буллай, медициналул ортопедиялул кафедралий зузисса Аьвдулкьадир ХIажиев.
Ванал щала оьрму хас бувну бур медициналун. Сайки 60-хъул шинну хьуну дур ккарччал техникну зий, ккарччив дакьин дуллай ва студентътурахь дарсру дихьлай.

Увну ур Аьвдулкьадир 1942-ку шинал ноябрь зурул 10-нний Хъюлив Ахъушиял райондалий. Бувагу шанма барз бивкIун бур Аьвдулкьадирдун бутта дунияллия лавгсса ппурттуву. Ппу ивкIуну махъ, хъунма хIал къавхьуну, диркIуну дур ванал нинугу. Тай захIматсса, ккашикарсса дяъвилул ва дяъвилия махъсса шиннардий ялгъузну ливчIун бур мюрщисса оьрчIру бу­сса кулпат. Аьвдулкьадир цал Гъумучиял интернатрайн, яла Уркарахрай­сса интернатрайн агьну ур. АцIва класс къуртал бувну бур Губденнай. Тай шиннардий­сса оьрчIшиву хьуну дур кIилийну захIматсса. Ялув ацIансса, ка-кумаг бансса цучIав акъасса ятинсса оьрчIал цалва хIарачат бувну, дуклан ув­ххун ур МахIачкъалаливсса Медициналул училищалувун.

Мугу хьхьичIунсса хIасиллай къуртал бувну, зий ивкIун ур кьурахъул шинай ккарччал техникну республикалул стоматологиялул поликлиникалий. 1974-ку шинал Дагъус­ттаннал Медициналул институтгу къуртал бувну, зий айивхьуну ур хIакин-стоматологну вава поликлиникалий. Опыт бусса, цала даву куртIну кIулсса хIакин, оьрмулул шиннардих къаурувгун, хIакьинусса кьинигу зий ур стоматологиялул кафедралул ортопедиялул ассистентну. Ва кафедралийнгу ваначIан букIлайнма бур хьхьичIава ккарччив хъин дуллай бивкIсса инсантал. Аьвдулкьадирдул, студентътурахь дарс дирхьуну махъ, чIун ляркъуну, цайнна дакъа вихшала къадуллай бувкIсса инсантурал ккарччив, хIакьинусса кьинигу дакьин дуллайна ур.

ХIакин акъассагу, Аьвдулкьадир ур машгьурсса спортсменгу. Тана та жагьилния шинай цурда ца кьини хьуну да­къар ванал гьарца кIюрххил «Труд» стадиондалийн ягу хьхьирийн зарядка дан къалавгсса.
«80-ку шиннардий «Труд» стадиондалийн кIюрххицIун батIайссияв лагма-ялтту ялапар хъанахъи­сса инсантал зарядка дуллан. Тикку ДГУ-лул, ДГПИ-рал, Элмурдал академиялул филиалданува преподавательтурал ххуйсса команда сакин шайва.

Тайннавасса ца Лысов тIисса фамилия дусса, ия куклусса атлетикалулухун агьсса. Мунал нагу та командалува язи увгьунав Да­гъусттаннал ва Аьрасатнал чемпионатирттай гьуртту хъанан. 2000-ку шинал Краснодардай хьу­сса Аьрасатнал чемпионатрай танащал архIал гьуртту хьуну, бувгьуссия нагу кIилчинсса кIану»,-тIий, дакIнийн бутлай ур цува цалчинсса бяст-ччалливу гьуртту хьу­сса куц.
Оьрмулул 60 шин хьуния шинай Аьвдулкьадир унгу-унгуну профессионал спортрахун агьну ур. Спортрал ветерантурал дянив ванал ххуйсса хIасиллу дурну дур, Дагъусттаннал, Аьрасатнал, Дунияллул куклусса атлетикалул первенствардай ва Олимпий тIуркIурдай гьуртту хьуну.
2013-ку шинал Италиянаву Туриннай хьусса ветерантурал дянивсса Дунияллул спортрал мастертурал тIуркIурдай гьуртту хьуну, Аьвдулкьадирдул кIилчинмур кIану бувгьуну, Аьрасатнал цачIундур командалувун арцул медаль ххидурссар.

Вай тIуркIурду архIал бихьлай бивкIссар олимпий тIуркIурдащал.
2014-ку шиналгу Венгриянаву хьусса ветерантурал дянивсса куклу атлетикалул первенствалий гьуртту хьуну, бувгьуну бур ванал кIива хьхьичIунсса кIану. Гьарца шинал Аьрасатнаву ва Да­гъусттаннай хьусса куклу атлетикалул соревнованиярттай Аьвдулкьадирдул мудан цалчинсса ягу кIилчинсса кIану бугьайсса бивкIун бур.
ХIат-хIисав дакъар ванал спортраву дурсса хьхьи­чIуннай­шивурттахлу лайкь дур­сса наградарттал.
Дунияллул халкьуннал чемпионатирттая хьхьичIунсса кIан­ттурдащал зана хьусса спорт­рал ветерантурах жула республикалул дагьайсса къулагъас чансса душиву асар хъанан бикIай тIий, буслай ур Аьвдулкьадир наградарттугу ккаккан дуллай.

Вай махъсса шанна­хъул шинай, санкциярду бахчилай, Европанавусса ва Дунияллул кьатIувсса чемпионатирттай гьуртту хьун къабювхъунни, хаснура утти пандемиялуцIун дархIусса тагьаргу цинявннан кунна, жунгу тIааьнсса къархьунни. Дунияллийсса тагьар къулай хьуну, цимурца паракьат хьуну махъ, Аллагь­нал кабавкьуну, на ванияр тихуннайгу ттунна ххирасса спорт кьаритан дакIний акъара, — тIий, буслай ур Аьвдулкьадир.