[dropcap]А[/dropcap]гьалинал цIуллу- сагъшиву дуруччаврил цIаний бивхьусса захIматрахлу ва коронавирусрал инфекция сукку хьусса чIумал мунияту буруччаву мурадрай дурсса хъуннасса даврихлу
медициналул зузалтрал пишалул байрандалуцIун бавхIуну Моздокрал райондалул администрациялул чулуха ХIурматрал грамота дуллунни АьвдурахIманнул душ Людмила Загалован. Ва Людмилан цуппа бувсса кьинилийнсса бахшишнугу хьунни.
Андриана Аьбдуллаева
Ххаллилсса хIакин — терапевт ва хIакин — гинеколог, жула лаккудуш Людмила Загаловал 14 шин дур Моздок шагьрулий ялапар хъанай ва зий. Загалова ванил ласнайхчIинсса фамилия дур. Людмила щар хьуну бур аьсатIин оьрчIан. Цуппарив ва бур Нальчик шагьрулий мина дирхьусса Хъуннащатусса АьвдурахIманнул ва ТIутIил цаннияр ца авурсса ххюва душнивасса ца. Буниялагу, вайннал душру циняв бакIралгу ххуйсса, дуккавриву- давривугу итххявхсса душру бур. Миннава шамуннил хIакиннал пиша язи бувгьуну бур.
Цинявппа ласкъатрайгу, цивппа- цивппа зузисса кIанттурдайгу бусравну бур. Аллагьу Тааьланал арс къаулурчагу жун, ца-ца душ ару- арула арснал багьасса хьунни,- тIий рязину бикIай нину- ппугу.
— Жу жула дадахь ва мяммахь даин учару: «Пикри мабари, зул арс акъахьурчагу, жу зун арснал баймур бан, зул цIарду бюхттул дан, гьаз дан хIарачат бантIиссар . Арцу- мусих цIарду чичин лайкьсса нину – ппуру зу», тIий, буслай бур цуппа Людмила. Мяйжаннугу, нитти — буттал цивппа ччаннай бацIан бан, инсантуравун буккан бан бивхьусса захIматрал кьадру — кьимат кIулсса душру бур вай.
Людмилал буттал ниттил СахIибатлул ванийн ляълул жавагьир куну бакъа къаучайссиятIар. Гьарица чулуха мукунсса цIанин лайкьсса душ бур ва.
Людмилал Нальчикрай ЯтIул дипломрай къуртал бувну бур медициналул институт. 17 шин дур ванил цIуллу- сагъшиву дуруччаврил аралуву зий. Миннува 14 — Моздокрал поликлиникалий терапевтну ва архIала хъаннил консультациялий гинекологну зий. Ва бур высший категориялул хIакин. Ва кIулсса инсантурал цинявннал, ваничIан цал бунугу багьсса къашайшалтрал – аьсатIиннал бикIу, Моздок шагьрулий ялапар хъанахъиса лакрал бикIу Людмила Заннала ляхъан бувсса хIакин бур учай.
Ва, мяйжаннугу, лавайсса даражалул пишакар ва цIими бусса хIакин бур. Вай гьантрай бувксса «Моздокские вести» кказитрай дур Людмилаясса макьала. Жунмагу тIааьнни жула лакку душ чил кIанттурдай укун сийлий ва хIурматрай бушиву. Людмилал бур ххаллилссса тарбия ларсъсса, школалийгу марцIну ххювардай дуклакисса кIия арс — Альшевт ва Алмаз. Жула учай, инсаннал ва дунияллий къатри дан, мурхь бугьан ва арс хъуна ан аьркинссар куну. ЧIивисса оьрмулуву ми гьарзат дан бювхъусса инсан бур Людмила. Цила захIматрайну ва хIарачатрайну ванил дурну дур Моздокрай царай ккаккиялунсса авурсса кIизивулийсса къатри. Гьар цимурца цIу-цIампир буну дан кIулсса, усттарсса, бюхъу-бажар бусса душ бур.
Жу дакIнихтуну ххариссару жула лаккудушнил хьхьичIуннайшивурттая ва бахшиширттая. Мунияргу бюхттулсса наградартту ласлай ккакканнав. Бюхълай личIаннав.
