[dropcap]Д[/dropcap]укIу гъинттул ттун, кулпатращал Москавлия Анжилив нанисса чIумал, Къалмукьнал Элиста шагьрулия Южно-Сухокумскалийн аьрххи багьуна.

Цикссагу шиннардий навтбуккуну зий уссия Цалчинмур ЦIувкIратусса Сулайманов Кьур­­банмахIаммад ва энергетикну ванала уссу Сиражуттин. Вайннах алхIам буккин бия. ЧIумуй бивкIулийн гьан къавхьуну, сант дагьайхту, увкра ххуллийн.

Москавлия ливчуну махъ ххуллийх полициянал бацIан баву дакъая, так ца Ставрополлал улклул ва Дагъусттаннал дазуй личIаннин. Микку кьурахъул минутIру хьуна, машина ва документру ххал буваннин. Агана машинарттал ва автобусирттал ла­хъисса кьюкьа дакъахьурча, хъунма хIал хъанай бакъая пострай бавцIуну.

Сухокумскалив биявривунма, КьурбанмахIаммадлул кулпатрахь, оьрчIахь МахIаммадлухь, Русланнухь, душнихь жижара барду, Южно-Сухокумскаллал хIатталливгу лавгру.
Южно-Сухокумскалий бивру, 1970-1972-ку шиннардий 1-мур ЦIувкIрату лавгния махъ ххал къавхьусса, АьвдурахIимов РамазаннучIангу.
1970-ку шиннардий, нину диркIусса чIумал, буттал Аьбдуллул Рамазан увцуну ия къутандалийн цана кумагран ва гиккува, Сухокумскалий, школалийнгу занан. Вайми уссурвал ЦIувкIрав дуклай буссия.
Рамазаннущалсса ихтилатрава кIул хьунни, Южно-Сухокумскалия мадарасса манзилданий, ЦIувкIуллал колхозрал даэрду дусса кIанттай дурну душиву крестьяннал хозяйстварду.

Рамазаннущал, мунал машиналий, жу лавгссияв ХIажи­кьурбанхъал Юсуплул хозяйствалийнгу. Жу бучIаврия Юсуп хъинну ххари хьуна. ВаначIа бу­ссаксса хIаллай чIаравмур хозяйствалия жучIан увкIуна цамагу цIувкIрачу – ХIажиев Ризван.
Юсуплул 2010-ку шинал тIиртIуну дур крестьянско-фер­мерское хозяйство. Аьрщарал­сса байсса министерствалул итадаркьуну дур аьрщи.

[dropcap]Ю[/dropcap]суплул машан лавсун бур лухIи ризкьи, ятту, аьнакIив, бувну бур ппал-сарай, ттукIгу бувцуну мивун. Ххулув ябуллансса кIанттай дурну дия магъи (навес). Архний чIалай дия щинал турбарду бишинсса канал дуллали­сса трактор.
ЦачIа 4 инсан зий ур тIива Юсуплул. Арснал ва кулпатрал, Пирдавслул, мудан кумаг бай­сса бия. ЦIанасса чIумал азарва­хъул ттал хIайван ва 30 гъаттарал хIайван бия. КIинттулнин лавсун бия 3 азарва кип ххалал ва нухьхьал-соломалул, 20 азарда кило комбикормалул.
Арх дакъа мукуннасса хозяйство Ризваннулгу дия. ВаначIагу азарвахъул ттал хIайван ва 40 гъаттарал хIайван бусса бия. Мукуна ваначIагу 4 инсан зий ия. КIинттулнин ххулув, солома, комбикорма хIадур дурну дия.

[dropcap]Ш[/dropcap]иккура, так цамур чулиннай, АьвдурахIимов Рамазаннул ва ванал уссил, Бакрил, хозяйство дусса дия. Ттун Бакри къа­ххалхьуна, комбикорма машан ласунсса хIакъи-хIисав дан лавгунни тIий.
На тикку уссаксса хIаллай ца ппурттуву аьнакIив ливхъуна сарайлувун. Гужну марчгу бивщуну, хъун бакъасса хIаллайсса чявхъа-гъарал ларчIуна.
Мадара хъунисса ккаччивгу бия хозяйство ядуллай. Жу Рамазаннущал махъунмай нанисса чIумал, ккаччив мадара­сса ххуллийх жу тIайла бу­ккан бувкIуна.

МахIаммадхIажи
Загьидинов,
ш. Москав