АьФ-лул ЗахIматрал ва социал иширттал щаллу баврил министерствалул баян буллай бур, коронавирусрал инфекциялуцIун дархIусса тагьар хIасул шайрину, агьалинан паччахIлугърал чулуха буллалисса кумагирттая.
Миннува ца хъанай дур, нигьачIаву дусса шартIирдай социал иширттал идарарттай ва стационардай зий, ххишаласса хъар лархъун най бивкIсса зузалтрансса выплатартту.
Имара Саидова
ХIукуматрал чулухасса арцуйнусса кумагру ккаккан бувну бур 2020 шинал апрель зурул 15-нния июль зурул 15-ннин социал иширттал идарарттай, стационар отделениярттай хасъсса режимрай зий бивкIсса, чIумуйнусса стационардай ялапар хъанай зий бивкIсса зузалтран.
Выплатартту дагьлай дур 14-хъул (ва хъанай бур ца смена) гьантлул мутталийсса сменардай зий бивкIсса зузалтран:
— хIакинтуран 40 азарда къуруш дагьлай дур, агана стационарданийми социал иширттал дузал буллай бивкIхьурчан, дузал къабуллай бивкIхьурча – 60 азарда къуруш.
— дянивсса медициналул персоналданун: фельдшертуран, медициналул дезинфектортуран, лаборантътуран, массажрал ва процедурардал, физиотерапиялул медсестрахъан, хъуними медсестрахъан, лечебный физкультуралул инструктортуран, инструктор-методистътуран – 25 — 35 азарда къуруш.
— социал иширттал зузалтран, социал зузалтран, кулпатирттащалсса даврил аралуву зий бивкIсса пишакартуран. Мува аралуву зий бивкIсса психологтуран, педагогтуран, логопедтуран, администрациялул иширттал персоналданун – 25-35 азарда къуруш.
Ялагу медициналул мюрщими персоналданун, сестра хозяйкахъан, санитаркахъан ва бизан къашайсса къашайшалтарах буруглай бивкIсса зузалтран – 15-20 азарда къуруш.
ЛичIи-личIисса давурттай зий бивкIсса технический персоналданун – 10-15 азарда къуруш.
Вай выплатартту дулунтIиссар зий бивкIсса гьарца сменалух.
Балжину вай выплатардая кIул бан бюхъайссар АьФ-лул ЗахIматрал министерствалул сайтрай (https://mintrud.gov.ru/).
