[dropcap]М[/dropcap]укъул тархъаншивуну, ттул пикрилий, хъанахъиссар инсан цува рязи акъамуния, цува аьраттал уккан уллалимуния нигь дакъа бусаву, чичаву.
Амма иширайну му мукуннивкьай хъанахъисса?
ТIайлар, жулва билаятрайсса система даххана хьуну махъ, тархъаншивугу ххишала хьунни. Дакъар, хьхьичIра куннасса, ялув бацIай органнал чулухасса ялун бигьлагьаву. Инсаннаща цалва дакIниймур, цалва пикри бусан бюхълай бур, иширайнурив тIурча, му щаллу буван бигьану къабикIай. Къачанну хьунабакьару жува таксса персоналун аьркинсса куццуй ишру, хьумур бакIрая ччаннайн, ччанная бакIрайн кIура баен буллалисса кIанттурдащал. Нажагьссавагу акъахьунссар жула дянив, школалий тIий, институтраву, даврий тIий, мукъул тархъаншиву лиян дуллалисса иширал барану къавхьусса. Мукунсса иширттайгу махIаттал хъанахъиссагу чIявусса къахьунабакьай.
Муниятугу, ттул пикрилий, мукъул, пикрилул тархъаншиву – му тачIаврагу бигьасса категориялул зат дакъар. Му кIану мукун бушиву ххуйссарив ягу оьккиссарив – вагу личIисса ихтилат бухьунссар.
