ЗахIматну къашавайсса оьрчIан

[dropcap]В[/dropcap]ай гьантрай МахIачкъалалив ОьрчIансса шагьрулул клиникалул азарханалий тIивтIунни, кьува кIану бусса, захIматну къашавайсса оьрчIансса, паллиатив, яни оьрмулун нигьачIаву дусса азарду хъин дувайсса отделение. Уттинин Дагъусттаннай ва журалул отделение бакъассия, захIматну къашавайсса оьрчIангу, миннал нитти- буттахъангу, ва чара бакъа аьркинсса отделение бунугу.


П. Рамазанова
[dropcap]В[/dropcap]а отделение тIитIаврил мажлисрай гьуртту хьунни респуб­ ликалул премьер-министр Артем Здуновгу. Ванал кIицI лавгунни паллиатив журалул кумаг­рал паччахIлугърал программа республикалул бюджетравасса арцу харж дурну бартдигьлагьишиву.

Шиккува гьуртту хьусса республикалул цIуллу-сагъшиву дуруччаврил министр Жамалуттин ХIажиибрагьимовлулгу бувсунни цIусса отделениелий хасъсса кIулшивуртту ларсъсса хIакинтурал хъин буллан­тIишиву 18 шинавун бияннинсса, захIматну къашавай­сса оьрчIру ва миннавухва хъин буллантIий бушиву онкологиялул азарду дусса оьрчIругу. Отделение цимурца аьркинмунил дузал бувну бур: ттизаманнул оборудование, ИВЛ аппаратру, медициналул техника дур.

Республикалий 800 оьрчI усса ур паллиатив кумаг аьркинсса. Вай захIматну къашавайсса, муданма хIакинтурал кумаг аьркинсса оьрчIру бур. Вайннал къювурду лагь дуванмур буллай, шайкун вайннаха аякьа дуллай, зунтIиссар паллиатив кумаграл пишакартал. ЗахIматну къашавайсса оьрчIах буруглан азарханалийн битайсса бур нину-ппу ва гъан-маччамигу. Ласу-ка бавхIуну ливчIсса, оьрчIал къювурду чIалай къума лаглагисса нитти-буттахъангу, оьрчIан цанмагу ва отделение тIитIаврия, цахъис дунугу, рахIатшиву ва кумаг хьун аьркинссар. Укунсса отделенияртту, хосписру Аьра­сатнавугу, цайми билаятирттайгу ччянива зий буссар.