«Дагъусттанная ссайгъатран цир ласунтIисса гъан-маччаминнан, дустуран?» — тIисса суал хIасул шай жулла республикалийн бувкIсса туристътураву.
Дагъусттаннал усттартурал карунних дурсса сувенирду дакъасса, республикалул хъамаллурачIа ялагу машгьурну дур жулла деликатесругу: турт, ккурккимай, нис. Жулва базардавун багьсса туристътурал ххаришиврул, махIаттал шаврил ахир къадикIай, ми ххарину ласлан бикIай кьакьан дурсса ахъулсса, турт, кьакьан дурсса уртту ва м.ц.
Дагъусттаннайн хъамалу багьсса ца хъамитайпалул кIанттул помидордугума машан ласлай бия: «ЖучIа укунсса помидорду 300 къурушран дур, шийх тIурча, 80 къурушран дур. Цукунни къаларсун бацIан?» — тIий.
ТIайлассар, цанна хIаз дирзсса вагу, тагу ласлай, туристътуран яла «перевесрал» масъала щаллу буллангу багьай.
Сувенирдая тIурчаннив, чIявуми туристътуран цамуния хавар къабикIай, оьргърал усттартурал карунних дурмуния бакъа – цирдагу къакьюркьусса ва чIявучин аьркин къашайсса арцул самоварду ва ххаржантру. Ялагу личIири душварал ласайсса, заргалтурал карунних дурсса, багьлулгу ххира дакъасса чIюлушиннарду. Бархъаллал тIахIунттив тIурча (хъурзилттащалсса ттукри бикIу, махъсса цайми-цайми затру дикIу), хъунмасса гъирарай ласлан бикIай туристътал.
Дагъусттаннаясса сувенирду — ми анжагъ сувенирду дакъар, ми жулла культуралул бутIар.
